Jowai, Nailar 11
Haba pynksan halor ka jingbhah tang 20 lak tyngka na ka 16th Finance Commission ïa ki MDC jong ka Liang Pyrshah, u Deputy CEM jong ka JHADC u Ma Lasky Rymbai u la ong ba ha ka synshar paidbah (democracy) ka rukom sam skhim kam ju long mar katjuh hapdeng ka Liang Synshar bad Liang Pyrshah.
Kum ban shu pynkynmaw ki MDC jong ka VPP bad ka Congress ki la dawa ban pynkiew ïa ka bhah jong ki na ka 20 lak tyngka sha ka 50 lak tyngka na ka 16th Finance Com-mission.
Haba kren sha ki lad pathai khubor u Ma Lasky Rymbai u la ïathuh ba ka KHADC kala ïoh ïa ka mang kaba 85 klur tyngka, ka GHADC 76 klur, katba ka JHADC kala ïoh ïa ka mang kaba tang 28 klur tyngka, bad kane ka jingbhah pisa na ka 16th Finance Commission ka long ha ka dur jong ka ratio 9:8:3.
U la ïathuh ba hadien ka jingïoh ïa katei ka pisa na ka Finance Commission, ki la shong jingïalang jong ka Joint Parliamentary Party (JPP) bad ki la rai ban bhah sha ka Liang Pyrshah kumba 20 lak tyngka, hynrei na ka Liang Pyrshah kim hun satia ïa kata ka jingbhah skhim bad ki la dawa ban pynkiew sha ka 50 lak tyngka.
U Ma Lasky u la ïathuh ba don ki paralok napoh KHADC kiba phone sha u, bad u la batai shai ïa ki ba ka JHADC ka bhah mar 20 lak tyngka sha ka Liang Pyrshah bad kaba tam kan leit sha ki MDC ka Liang Synshar.
Haba ïathuh halor ka rukom ai skhim hapoh KHADC, u Ma Lasky u la ong ba ha KHADC ruh ki bhah mar 50 lak tyngka kawei ka Constituency sha ka Liang Pyrshah, hynrei ha JHADC la bhah mar 20 lak tyngka kaba ïoh ïa ka mang kaba rit tam tang 28 klur bad kane hi ka pyni ba dang tam ka JHADC ban ai bun ïa ka bhah sha ka Liang Pyrshah.
Halor ka jingai por ban pyndep ïa ki skhim jong ka Sorkar Pdeng, u Ma Lasky u la pyntip ba ka Sorkar Pdeng kala ai por ïa ki ban pyndep hapoh 15 tarik Nailar, 2026, katba na ka liang ka tnad kala aipor ban submit hapoh ka 5 tarik, Nailar.
U la pyntip ruh ba baroh ki MDC ka Liang Pyrshah kila dep ban submit ïa ki ‘proposal’ ne jingtyrwa ki jong ki shapoh ka tnad.
