Shillong, Nailar 11
Ki Pulit ka Anti Narcotics Task Force (ANTF) ki la ïoh kurup ïa u drok heroin uba khia 32.64 gram bad shongdor kumba T.5 lak bad ban kem ruh ïa 2 ngut ki briew ha ki ar tylli ki jingkhynra ha Umiam ha ka miet 10 tarik mynta u bnai.
U SP ka ANTF Vikash Kumar u la ong ba ka Task Force ka la pynïeng da ka NAKA ne jingtalasi hadien ka jingïoh ïa ka jingtip kaba bniah ban talasi ïa ki suba nongkhaïi kiba rung sha Shillong.
Ha ka jingkhynra kaba nyngkong, la pynsangeh ïa ka kali kaba don ïa u registration number AS01-AV-1166 ha Lad Umiam ha ka por janmiet. Ki pulit ki la talasi ïa u nongñiah kali u Allan Marwein uba na Mawlai Nongkwar ha ryngkat ka jingïadon lang jong ki nongsakhi paidbah.
“Kawei ka synduk plastik ba thep sabon ba la thep u drok suba heroin, la ïoh ban kurup. Haba la leh tes, u la tes ‘positive’ bad don ka jingkhia kaba 10.93 gram, la ong u Vikash Kumar.
Hadien shi kynta eiei, kawei ka scooty kaba don ïa u registration number ML05-AB-9546 kaba la pyrshang ban phet krad na ka jingtalasi, la lah ban ïoh bat noh. Na ka liang ki pulit ki la lap noh ïa ki ar tylli ki synduk plastik ba thep sabon na ka jaket jong u nongñiah jong kane ka scooty, u Jaziel Nongjop Syiem.
“Hadien ba la leh tes, la lap ba u la tes ‘positive’ ban dei u heroin, bad uba don ka jingkhia kaba kumba 21.71 gram,” la ong u SP.
Ïa kine baroh ar ngut kiba la kem, la pynngat noh hapoh ka kyndon jong ka NDPS Act, 1985.
Haba pyntip halor ka jingpynlong ïa ki jingkhynra, u SP ANTF u la ong ba ha kine ki lai sngi, la ïoh ban kurup ïa u heroin uba khia kumba 80 gram bad ban kem ruh ïa saw ngut ki briew.
