Shillong, Nailar 11
U President ka UDP Bah Metbah Lyngdoh ha ka sngi Ba-ar u la kyntait ïa ka jingkam bad kynnoh jong u President ka Congress Bah Vincent H Pala ba ka Sorkar MDA kan kyrshan ïa ka jingthmu wanrah jingkylla ha ka FCRA ha Parliament.
Haba kynthoh halor ka jingkren u Bah Pala, u Bah Metbah u la ong ba ki nongïalam ka Jylla ki la dep ban rah bad pynsngew ïa ki jingsngewkhia ki jong ki hakhmat jong u Myntri ka tnad Kam Pohïing ka Sorkar Pdeng u Amit Shah.
“Ngam tharai satia. U Myntri Rangbah u la dep ban ïakynduh markhmat bad u Amit Shah. Ha ryngkat bad kiwei ki nongïalam ka Jylla, u la ïalam ïa ka kynhun ban pynpaw ha u Amit Shah halor ki jingdonkam ha kaba ïadei bad ka amendment Bill,” u la ong.
Haba kylli hato ka UDP kan kyntu ban pynlong ïa ka jingïalang jong ka MDA na ka bynta ban shim kawei ka rai pyrshah ïa ka Bill, u Bah Metbah u la ong kam donkam satia.
