Shillong, Nailar 11
Ka Voice of the People Party (VPP) hapoh ka jingïalam u Bah Ardent M Basaiawmoit ki la leit ban ïakynduh ïa u Lat ka Jylla u C.H. Vijaya-shankar mynta ka sngi ha ïingsah jong u ba un pynpoi ïa ka jingthoh sha u Amit Shah uba dei u Myntri ka Sorkar India uba dei peit ïa ka kam pohïing ban pynsangeh shwa ïa ka FCRA Amendment Bill namar donkam ban ïasyllok bad ki nongïalam niam bad ki riewshemphang.
Haba ïakren bad ki nongthoh khubor, u Bah Ardent Basaiawmoit u la ïathuh ba ka VPP ha kine ki sngi ka la dep phah jingthoh sha u Myntri Rangbahduh ka ri India u Narendra Modi hynrei mynta ka sngi ki la phah jingthoh sha u Amit Shah lyngba u Lat ka Jylla ban pynsangeh shwa ïa kane ka FCRA.
“Ngi sngewthuh ba ïa ka pisa ne ka jingïarap kaba wan nabar ban pyndonkam pyrshah ïa ka ri india ïa kata ym lah ban pdiang” u la ong.
U la ong ba ka jingwanrah ïa ka FCRA ka jingthmu ka Sorkar India ka long ban pynbeit thymmai haba pyntyllun ïa ka pisa kaba wan ka jingïarap nabar ka ri ha kaba ka Designated Authority kan shimti ïa ka pisa kaba wan nabar na bynta ki riew shimet ne ki seng treimon sngewbha kiba la shah pynduh ïa ka syrnod jong ka FCRA.
U la ong ba ha ka FCRA lada shah pynduh ïa ka syrnod kamut kine ki riewshimet ne ki seng treimon sngewbha kim ïoh lad ban pynsngew ne ban kyrpad, kumta ban weng ïa ka jingartatien donkam ban pynsangeh shwa ïa kane ka Bill khnang ban wanrah shwa ïa ka jingïaphylliew jingmut.
U Bah Ardent u la ïathuh ba u Lat ka Jylla u la pynthikna ban pynpoi ïa kane ka jingthoh ba la phah da ka VPP sha ka ophis jong u Myntri ka tnad kam pohïing ka ri u Amit Shah.
