Shillong, Nailar 12
Hadien ba la mih ka jinghuri hura ha ka dorbar paidbah jong ka Hima Langrin, ba la pynlong ha ka 07 tarik u Nailar 2026, na ka liang u Syiem ka Hima Langrin u Nongtei Sing Syiemiong ha ka 12 tarik u Nailar 2026, u la lum la lang ïa ki Lyngdoh, ki Myntri ban ïakren sani bha halor katei ka kam.
Ha kane ka jingïalang kaba la pynlong ha Nongbah Shillong, la wan ban ïadonlang da ki Lyngdoh nalor ki Myntri kiba na ka Hima Langrin bad kiwei-kiwei de ki dkhot ka Hima.
Haba kren sha ki lad pathai khubor, u Bah W.L Sangriang, Lyngdoh ka Executive Dorbar Hima Langrin, u la pynpaw ka jingbitar halor ka jingjia kaba la jia ha katei ka sngi, da kaba kynnoh ba ka daw kadei namar ki politician bad ki businessman, kiba don bynta ha ka kam khaïi mawshun bad dewïong ha katei ka Hima.
U la ong ba don napdeng kiba pyrshah ki bym dei na katei ka Hima, hynrei kidei kiba la shah ai nong ha ki businessman tang ban wanrah ka jingkulmar ha katei ka dorbar paidbah jong u Nongtei Sing Syiemiong.
U la ong ruh ba ha ka jingpynïaid u Pa’iem Nongtei, ki kam ki jam ki ïaid beit shakhmat, katba naduh ba shah sospon pat, ki kam ki la ïaid ha ka rukom ka bym ïahap bad i kumba la shah pynïaid ha ki politician nalor ki businessman.
“Ha katei ka sngi ba mih ka huri hura, ki liang pyrshah ki la wan ban pynpait ki shuki bad kawang da ki maw ïa ka tarpar, bad lada jia ba ngi ruh ngin pyni da ka bor ban ïaleh pyrshah, ka lah ban mih ka jingmynsaw bad ka jingïap briew ruh,” u la bynrap.
Haba bynrap pat na ka liang u Pa’ iem Nongtei Sing Syiemïong, u la ong ba kiba pyrshah watla ki la wanrah ka jingkulmar ha katei ka jingïalang, hynrei haduh mynta kim pat sngewthuh, da kaba kdew ba ki khyllew bad ki sngew sarong pynban.
Naduh ba nga shah sospon, kiba pynïaid ïa ki par dewïong bad mawshun ki khlem siew shuh ïa ka bai musur nalor ka bai khajna sha ka Hima, kaba la kot haduh 7-8 klur. Kumta, kadei namar kane ka daw ba ki pyrshang ban pynkulmar, la ong u Pa’iem.
Nalor kata, u la maham ruh ïa kiba pynkulmar ba kim dei ban bteng ïa kane ka kam, namar ba u don ïa ki sakhi sabut bad lada kino-kino, kiba dangïai bteng um banse ban sei ïa ki sabut satar ban pynshisha.
Namarkata, u Nongtei u la pynrem jur ruh ïa kane ka jingleh jong ki paidbah, da kaba shu wan pynkulmar ha ka jingïalang.
