Shillong, Nailar 12
Kum shi bynta ban shim ïa ki sienjam ban pynkhuid ïa ka lyer ha Byrnihat kaba dei ka thaiñ ba jaboh tam ka lyer ha ri India, ka Sorkar Jylla Meghalaya ka thmu ban pyndonkam da ki kor ki bor (Machine) ba lah ban pynkhuid ïa ka lyer ha katei ka thaiñ hadien ba la ïoh ïa ka Proof of Concept (POC) kaba la pynlong ha ka jingïatreilang ka Meghalaya State Pollution Board (MSPCB).
Ka kor ba pynkhuid ïa ka lyer ka dei kaba la shna da ka Zero Carbon Tech24 Pvt. Ltd., ka dei ka kor kaba la ïoh ïa ka hok ban pyntreikam, kaba lah ban pynkhuid dalade ïalade, kaba treikam duna bha ka bording, kaba pynlong ïa ka kum ka kor kaba biang ban pynduna ïa ka jingjaboh ka lyer kaba mih shabar na ki karkhana.
Haba ai jingpynshai u Sandeep Sharma, u ba dei u Business Head, ka Zero Carbon Tech24 Pvt.Ltd,. bad uba ïatreilang bad u Abhijit Trivedi, u ba long u Nongseng jong ka Atglow Technologies ki la pynpaw ka jingsngewnguh ïa u Bah Sosthenes Sohtun uba long kum u Myntri ha ka Sorkar Jylla na bynta ka jingïalam bad ka jingshimkhia jong u ban weng ïa ki jingeh na ka jingjaboh ka lyer ha Byrnihat. Kumjuh ki la ai khublei ruh ïa ka MSPCB kaba la ailad ban pynïoh ïa ka POC bad kaba la ïathuh shai ïa ka jinglong jingman ka lyer sha baroh kiba don bynta.
Ka POC ka ai ïa ki jubab ba bha, kiba pynpaw ïa ka jingduna kaba jan 45% ha ka jingdon ki jaboh jabaiñ ha ka jaka ba leh ïa ka projek, Ka jingmih ka jubab kaba jop kum kane pynskhem shuh-shuh ïa ka jingshaniah ba ka teknoloji ka ban don ka bynta ha ka ban pynbha ïa ka jinglong jingman ka lyer ha ka thaiñ Byrnihat.
Shuh-shuh u Sharma u la pynpaw ïa ka rukom ba pynkhuid ïa ka lyer ba la shna kyrpang ha ka rukom ba duna ki jingsniew. Ka jingpynwandur ïa kane ka kor kaba pynkhuid hi dalade ka pynduna shibun ïa ka jinglut ha ka jingtreikam, katba ka pynthikna ruh ïa ka jingtreikam kaba khlem jingthut, kaba pynlong ïa ka kor kaba biang tam ban pyntreikam ha ki jaka ba don ki karkhana bad ha ki jaka sor.
Kane ka rai jong ka Sorkar Meghalaya ban ïaid sha khmat ha ka jingpyntreikam ïa kane, ka pyni ïa ka jingthrang jong ka ban pynkhuid ïa ka lyer, ka jingpeitngor kaba khlaiñ ïa ka Mariang bad ki lad jingïada ïa ka jingjaboh kiba kham pyrkhing ha ki shnong ba bun ki karkhana. Ki bor synshar ki ngeit ba ka jingpynïasoh lang ïa ki buit thymmai bad ka jingpyntreikam ïa ki kyndon kan ïarap ban pynbha ïa ka jinglong ka Mariang bad ka koit ka khiah jong ki briew ha ka thaiñ.
Lada ka jingpyntreikam ka long kaba jop, kine ki kor pynkhuid lyer kin lah ban ïarap shibun eh ha ka ban pynkhuid ïa ka lyer jaboh ha kylleng ka thaiñ Byrnihat, kaba pynpaw ruh ïa ka jingtrei shitom jong ka Sorkar Jylla Meghalaya ha ryngkat bad ka Meghalaya State Pollution Control Board ban wanrah biang ïa ka lyer kaba khuid na ka bynta ki nongshong shnong.
