Shillong, Nailar 12
U Myntri ka koit ka khiah u Bah Wailadmiki Shylla ha ka sngi Balang u la pyntip ba ka tnad ka la ïoh pdiang ïa ka kaiphod jong ka jingbishar bniah halor ka jingdawa ki nongtrei ka Meghalaya EMRI Workers’ Union (MEMRIWU).
Ki nongtrei 108 hapoh ka Jylla ki dang bteng ka jingïakhih teh lama ïong ban dawa na ka Sorkar ban ai jingithuh ba pura ïa ki nongtrei, ban pynbeit ryntih ïa ka tulop bad ki pyrshah ruh ban aiti ka jingpynïaid sha ki kompeni shimet ïa ki kali 108 hapoh Meghalaya.
Haba kren sha ki nongthoh khubor u Bah Wailad u la ong ba dang shen ka tnad ka la ïoh pdiang ïa ka kaiphod bad mynta ka dang bishar bniah ïa ki mat jingdawa jong ki nongtrei. “Hadien ba la bujli Director, mynta u Ramkumar u la wan shimti biang kum u Director ka tnad bad nga la dep ban lum ka jingïalang bad nga la bthah ïa u Director ban khot ïakren ïa ki nongtrei 108” la ong u Bah Wailad.
Shuh-shuh u Bah Wailad u la ïathuh, kaba sah mynta ka dei ba u Director ka tnad un khot ïakren ïa ki nongtrei ban pynsngew sha ki ïa ka jinglap lyngba ka kaiphod, u la ong ba ka Sorkar kan buh ïa ka kaiphod hakhmat ki nongtrei 108 ban shim lang ïa ka rai, kumno ban ïaid shakhmat “Shen ngin sa pynbeit noh ïa kine baroh” u la ong.
