Shillong, Nailar 12
U Myntri Rangbah ka Jylla Conrad K Sangma ha ka sngi Balang u la ong ba ka NPP ka dei kaba nyngkong eh ban leit pynpaw ïa ka jingsngewkhia ka Jylla halor ka amendment jong ka Foreign Contribution Regulation Act (FCRA) bad ka Sorkar Pdeng.
“Ha ka por ba wanrah ïa ka bill ha ïingdorbar, ka NPP ha ka jingshisha, dei ka seng saiñpyrthei kaba leit kren nyngkong ïa kane ka kam ha katei ka por. Nga la ïalam ïa ka kynhun CBCI, kynthup ïa u President bad General Secretary, ban ïakynduh ïa u Kiren Rijiju,” ong u Conrad.
U la bynrap ba ïa ka kynhun ba-ar na Meghalaya la ïalam pat ban ïakynduh ïa u Myntri ka tnad Kam Pohïing ka Ri.
“Ngam kynmaw ban don kawei ruh ka seng saiñpyrthei ka ban leit ïakren beit-beit bad ka Sorkar ne ki Myntri ka Sorkar hadien kata. Hadien kane, ngi ïohi tang saw ngut ki Myntri Rangbah bad kiwei ruh ki seng saiñpyrthei,” u la ong.
U Conrad u la ong ba ka jingleit ïakren kam dei satia ban myntoi saiñ pyrthei.
“Ka shu long ba ngi don ïa ka jingïadei bad ïajan bad ki seng bapher-bapher. Ha ka por ba ngi ïoh ïa kane ka jingtip, kum ka jingsngewkhia, ngi la kynthoh mar mar bad ïalam ïa ka kynhun sha Delhi,” u la ong.
Haba pdiang ïa ka jingphah ïa ka Bill sha ka Joint Parliamentary Committee, u la ong “Ngi sngewnguh ïa ka Sorkar ba ka la phah mynta ïa ka bill sha ka JPC. Ngi kyrmen ba ka committee kan sngap bad leh eiei ïa baroh ki jingsngewkhia na ki seng bapher-bapher, ki Balang bad kiwei ki kynhun niam”.
