Nongstoiñ, Nailar 12
Kum shibynta ban pynpaw ïa ka jingpyrshah ïa ka jingthmu ka Sorkar Pdeng ban wanrah jingkylla ïa ka FCRA Amendment Bill, 2026, ka Congress ha ka sngi Balang kala pynlong ïa ka jingïaid paidbah ha sor Nongstoiñ ban pynpaw ïa ka jingpynrem jur ïa katei ka jingthmu.
Ha kane ka sngi, ha shuwa ban sdang ïa ka rally, la pynlong shwa ïa ka jingïalang ha Congress Bhavan Nongstoiñ, West Khasi Hills District bad la pynbud pat da kaba ïaid ter ter da ka kjat shaduh sha Market Complex New Nongstoiñ ryngkat ki jingpyrta ïa ki kyntien pynrem ïa ka BJP bad ïa ka FCRA Amendment Bill 2026 bad la pynkut pat da ka jingïalang kaba lyngkot.
U Bah Vincent H Pala, President ka MPCC bad MP barim ka Jylla haba kren ha ka jingïalang u la ong, kane ka kam, kam dei ka kam tang jong ka Congress hynrei ka dei ka kam jong ka Ri bad ka jaidbynriew, ka kam jong ka jingshah lehbeiñ, ka kam jong ka jingknieh bad lute ïa ki tiar ki tar ïa ki jingdon jingem ki jong ngi.
U la pynpaw ruh da kaba ong, “Ngim dei ban sngewthuh bakla hynrei ngi ïeng kum ka Congress na ka bynta ka Ri bad ka jaidbynriew bad dei tang ka Congress kaba shlur, dei tang ka Congress kaba ïeng kumba long mynta bad kiwei ki shu sngap bad ki shu ai jem ba ka BJP kan trei katba mon namar balei ba ka don ka jingïadei”.
U la kyntu bad kyrpad ruh ïa ki paidbah ban shimkhia ïa kane ka kam ban kyrshan ïa ka Congress khnang ba kan lah ban ïaid shakhmat.
“Ka jingïakhih jong ngi kam dei tang ha Nongstoiñ hynrei ha Shillong, ha Nongpoh bad kylleng ka Ri India kum ka Congress bad ka jingïakhih ka jong ngi kam dei tang ha surok ka dei hapoh ka Parliament bad ngi la kular ban leit ruh sha ka ïingbishar na ka bynta ka Ri bad ka Jaidbynriew,” ong u Bah Pala.
U la ong ruh, “Ka jingïakhih ka jong ngi, ngi donkam ka jingduwai ka jingkyrshan jong ki paidbah khnang ba kane ka jingthmu kan long kaba jop.”
“Nga tip ba hapoh Mizoram ki jingïalang bapher bapher ki la pyrshah hynrei ha ngi ka don ka jingtieng namar balei kane ka Sorkar kaba mynta, ka don ka jingïadei bad ka Sorkar Pdeng, na kata ka daw ka pyntieng ïa ki briew ka pynkhang lad ïa ki briew,” la bynrap u Bah Pala.
U Bah Pala u la kyrpad ruh ïa ki nongshong shnong ba ki dei ban sngewthuh ba la kumno-kumno dei tang ka Congress ka seng kaba peit shisha ïa u duk bad kaba peit ïa ki rit paid.
Ha katei ka sngi, nalor u Bah Vincent Pala la don lang ruh u Bah Eric Kharsyntiew President jong ka District Congress Committee, Bah G Ningstar Marthong President ka Nongstoiñ Block Congress Committee, Bah JTS Thongni President ka Rambrai Block Congress Committee bad kiwei-kiwei.
