Shillong, Nailar 12
Ka tnad ka koit ka khiah jong ka Sorkar Jylla ha ka jingïatrei ryngkat ka Meghalaya Aids Control Society (MACS) ha ka sngi Balang ka la pyllait paidbah ïa ka Intensified IEC Campaign 2026 kaba long shi bynta ban ïakhun pynduna ïa ka jingdon kiba ïoh ïa u khñiang jingpang HIV ha ka Jylla.
Ha kane ka sngi la wan ban ïashim bynta u Myntri ka tnad ka koit ka khiah u Bah Wailadmiki Shylla kum u Kongsan, u Dr. Joram Beda, IAS, Commisioner & Secretary, Health & Family Welfare jong ka Sorkar Meghalaya, ka Dr. K.L Ïawbor Project Director MACS bad kaba long ruh ka Joint Director jong ka DHS, ka Dr. L.W Myrthong APD MACS, ka Principal jong ka Lady Keane College ka Dr. Anjalee M. Shangpliang, ki khynnah pule jong ka Lady Keane College bad St.Edmund’s College.
U Bah Wailad haba ai jingkren kum u kongsan ula ong ba ka Red Ribbon Club (RRC) ha ki College ka don ka bynta kaba kongsan ban pynphriang ïa ka jingtip shaphang ka HIV, ka jingpynphriang ïa ka khubor kaba shai bad kaba thikna ka long kaba donkam bha, khamtam hapdeng ki samla, ki samla ki dei ban long ki nongpynphriang ïa ki jingtip sha ki paralok, ki longïing bad ki shnong ki thaw.
U la pynpaw ruh ba ka HIV ka long ka mat kaba donkam ban ïakren bad u la pyntip ruh ba ka Sorkar ka ai ruh ïa ki jingtest HIV ba khlem donkam ban siew eiei, u la kyntu ruh ïa ki paidbah ba kin leit sha ki jaka ai jingsumar bad ba kin ïoh jingïarap bad ki jingshah sumar kiba khlem da siew.
Haba bynrap u Bah Wailad ula pynpaw ba ka Sorkar Jylla ka sngewthuh ïa ka jingkongsan jong kane ka mat bad ka la shim ïa ki sienjam ban pynkhlaiñ ïa ki Anti-Retroviral Therapy (ART) Centres, khnang ba ki briew kiba im bad ka HIV kin ïoh ïa ka jingpynkhiah kaba suk ban poi sha ki bad kaba lah ban ïoh ha ka por kaba biang, u la kyntu ruh ïa ki samla pule, khamtam ha ki College kiba don ka Red Ribbon Club, ban shim bynta bad ban ïarap ban pynphriang ïa ka jingtip kaba dei shaphang ka HIV/AIDS.
