Shillong, Nailar 12
Ki nongïalam ka United Democratic Party (UDP) hapoh ka jingïalam u Bah Lahkmen Rymbui, Myntri ka Sorkar Jylla, kila kyrpad ïa u Myntri ka tnad Kam Pohïing ka Ri u Amit Shah bad ïa ka Sorkar Pdeng ban pynsted noh ha ka ban ai jingmynjur ïa ki mat ba sahteng la slem jong ka Jylla, kynthup ka Meghalaya Residents Safety and Security (Amendment) Bill, 2020 bad pyntreikam ïa ka Inner Line Permit.
Haba kren sha ki nongthoh khubor ha ka sngi Balang, u Bah Lahkmen u la ong, ka MRSS (Amendment) Bill, 2020 ka dang sahteng sah wat hadien bala mynjur da ka ïingdorbar thawaiñ bad phah sha u Lat, uba la phah pat ïa ka sha ka Home Ministry.
“Ngi tip ba ka MRSSA Bill, 2020 ka dang sahteng wat hadien ba la mynjur da ka ïingdorbar thawaiñ bad phah sha u Lat, bad u Lat u la phah sha ka Home Ministry. Kumta, ngi la kyrpad ïa u Amit Shah ban khmih ïa ka khnang ba ngin ïoh noh ïa ka jingmynjur,” ong u Bah Lahkmen.
Katkum ka jingong jong u, u Amit Shah u la ai jubab ba ki don “Ar ne lai tylli ki mat kiba ka Jylla kan hap ban pynbeit, hadien kane, ka Sorkar pdeng ka lah ban ai jingmynjur,” bad bynrap “Ngim pat tip kiei kita ki mat tad haduh ba kin da phah sha ngi. Hadien ba ngi la ïoh pdiang, ngin sa tip kiei kita ki mat bad ngin sa ïakren ïa ki”.
Halor ka jingdawa ïa ka ILP, u Bah Lahkmen u la ong ba ïa kane ka kam la ïakren bniah bha. “Ngi la ïakren halor ka resolution jong ka ILP”. U la pyntip ba “Ïa ka ILP yn hap ban khmih bniah namar ka dei kaba donbynta ki Jylla bapher-bapher. Kumba phi tip, ngim dei kiba long marwei. Ngin sa nang kren ïa kane ka kam na kawei ka por sha kawei pat”
U la pyntip ba katba ka Sixth Schedule, Land Transfer Act bad kiwei ki aiñ ki ai jingïada, “da ka jingïaid ka por, ngi sngewthuh ba ngi dang donkam kiwei ki aiñ ban ïada ïa ki trai ri trai muluk jong ka Jylla”.
Ka kynhun kala ban jur ruh halor ka jingpynrung ïa ka ktien Khasi bad Garo ha ka khyrnit ba phra jong ka riti synshar ka ri bad pynpaw ba na ka liang u Amit Shah u la kular ba ki kam kila nang ïaid, “Ngi kyrmen ba kin sa pynurlong bad ba ngi dei ban long kiba ïai shah,” ong u Bah Lahkmen.
