Shillong, Nailar 12
Kawei ka shuki Executive Member ka Khasi Hills Autonomous District Council ka la thylli mynta la shi bnai shiteng hadien ba ka Sorkar Jylla ka la pdiang ïa ka shithi iehnohkam u Bah Pynkhraw Kharjahrin.
Ka Sorkar Jylla lyngba ka tnad District Council Affairs ha ka 19 tarik Jylliew 2026 ka la pdiang ïa ka shithi iehnohkam u Bah Pynkhraw Kharjahrin kum u Executive Member ba dei peit ïa ka tnad Building By Law.
Naduh ba la pdiang ka Sorkar Jylla ïa ka shithi u Bah Pynkhraw, ka Voice of the People Party haduh mynta kam pat thung bujli watla katei ka shuki ka la sah thylli mynta là shi bnai shiteng.
Haba pyrshang ban ïakren bad ki nongïalam ka VPP ha kine ki sngi kim shym la treh ban ai jubab.
Naduh ba la hiar shuki u Bah Pynkhraw, ki Executive Member mynta ki don satang 6 ngut bad u CEM Bah Winston Tony Lyngdoh.
Katkum ki khubor ba la ïoh lum, ïa ka kyrteng u EM hap ai ka jingmynjur da ka seng VPP ban phah sha u CEM bad u CEM un sa phah sha ka Sorkar Jylla ban ïoh jingmynjur.
