Shillong, Nailar 12
U Myntri Rangbah ka Jylla u Conrad K Sangma ha ka sngi Balang jong ka taïew, u la ong ba ka jingthmu jong ka Sorkar ban pynkynriah ïa ki nongdie madan, kadei ban pynneh bad ban ïada ïa ka lad kamai kajih da kaba pynkylluid ïa ki jaka paidbah, bad u la kubur ba kin don beit ki jingtynjuh.
Hadien ka jingkhmih bniah ïa ka ïew ha Polo, u Conrad u la ong, ba ka thong ka long da ka lad ban ïa ryntih lang na ka bynta baroh ki nongdie madan bad ki nongshong shnong.
“Ka jingthmu ka jong ngi ka long, ban ïada ïa ka lad kamai kajih katba lah. Hynrei ha kajuh ka por, ngi ïohi ba ha ki katto-katne ki jaka, ka long ka bym pat bit pat biang bha. Ki nongdie ha ki lynti ïaid kjat ki la kah lynti ïa ki paidbah nongleit nongwan bad pynmih ïa ka jingpynthud ïa ka Nongbah” u la ong.
“Kan ym don kano-kano ka jingpynbeit ka ban biang pura lut nadong shadong. Kan don beit ka jingeh bad ki jingïapeiñ. Ka jingthmu ka long ban wad ïa ka lad kaba biang tam kaba ngin don ïa ka lad ka ban ïa jop lang” la bynrap u Conrad.
U la ai khublei ïa ki nongdie madan kiba la ai ïa ka jingïatreilang bad u la kyntu ïa kiwei pat, kynthup ïa kito kiba don ha Laitumkhrah bad Jail Road ruh ban kynriah noh sha kiwei pat ki jaka.
“Ngi ngim don hangne ban knieh noh ïa ka kamai kajih ka jongno-jongno. Ngi sngewthuh ïa ki jingtynjuh. Hynrei ngi hap ruh ban pynneh ïa ka jinglong jingman bad ban pynlong ïa ki lynti ïaid kiba kylluid, khnang ba ki paidbah kim ym mad ïa kino-kino ki jingthud jingwit” u la ong. Halor ka jingpyrshah ban shah pynkynriah, u Myntri Rangbah u la kdew ïa ka jingbthah jong ka ïingbishar ba kadei kaba hap ban bud ryntih. “Ngi don ïa ki jingeh namar ba ka ïingbishar ruh ka la ai ïa ki jingbthah kiba eh. Ngi hap ban bud pyrkhing ruh ïa katei. Ha baroh kine kiei-kiei, ngi la leh ïa kaba bha tam na ka bynta baroh ki liang” u la ong.
U Myntri u la ong, ba ka jingpynkynriah kan pynmih ïa ka jingthud ïa mynta, hynrei kadei kaba donkam pat ïa ka Nongbah.
“Kiba bun ki surok kidei kiba lah dep ban pynkylluid. Ki lynti ïaid kiba ju don ka jingkah lynti mynshuwa kidei kiba la plie mynta. Kane ka la urlong namar ba ki nongdie madan ki la ai jingkyrshan bad ka jingtrei shitom jong ki ophisar. Ngi kyrmen ba ïa kum kane kajuh hi, yn lah ban leh ha kiwei-kiwei ki jaka ruh” u la ong.
Ha katei ka jingleit jngoh ïa ka jaka kaba la tei thymmai ïa ka Polo Vendors’ Market, u Myntri Rangbah u la khmih bniah ban ai jaka shong die jingdie ïa ki nongdie madan bad u la ïakren ruh bad ki.
La pdiang ïa u Myntri Rangbah da ki ophisar jong ka Shillong Municipal Board bad ki dkhot jong ka Town Vending Committee.
U Chairman ka TVC u la pynsngew ha u Myntri Rangbah halor ka rukom pyntreikam ïa ka ïew bad ïa ka jingpynkynriah ïa ki nongdie madan na ka thaiñ Polo bad Jail Road. U Conrad K Sangma u la sam ruh ïa ki cheque hapoh jong ka Chief Minister’s Urban Livelihood Grant. Ki nongdie madan kiba don ïa ki Certificate of Vending kin ïoh ïa ka T.20,000 bad ka T.10,000 kum ka jingai jingïarap kaba mardor bad T.2,000 man la u bnai na ka bynta 5 bnai lynter.
Haduh mynta, la dep ban ai 65 tylli ki CoVs ban shong die jingdie mar pyrshah ïa ka SBI bad 106 tylli na ka bynta ban die jingdie hajan Matri Mandir.
Ïa ka Polo Vendors’ Market, la tei ha ka jaka kaba 2,270 sqm, ka ban don ïa ka 620 sqm ka Hawker Area bad 132 tylli ki Stall ne dukan, 48 ngut ki nongdie madan kidei na Polo bad 84 ngut na Jail Road bad 72 ngut ki nongdie madan ki la dep ban shimti ïa ki jaka ban shongdie jingdie.Ïa kane ka jingpynkynriah, la leh hapoh jong ka Meghalaya Street Vendors Scheme, 2023, da ka Urban Affairs Department bad ki bor pynïaid district jong ka East Khasi Hills.
Ïa kum katei ka jingpyrshang kham hashuwa, la leh ha Khyndailad bad Civil Hospital.
La pynbiang ïa ki jingdonkam kynthup ïa ki paiñkhana, ka jingbuh ïa ki bording ilektrik ne LED Lights ha man la ki dukan bad 8 tylli ki Halogen Lamps. Ka ïew kadei kaba die ïa ki jhur, ki soh, ki jaiñ, ki jingbam, dohkha, dohsyiar bad ki dukan kwai.
U Conrad Sangma u la ong, ba ka Sorkar ka don ïa ka jingthmu ban pyniar ïa ka jingai jingkyrshan wat ha kiwei-kiwei ki jaka ruh.
Ka jingpynkynriah kadei ka jingthmu ban pynsuk ïa ka ïaid ka ïeng jong ki paidbah nongleit nongwan, ban pynduna ïa ka jingdheng kali bad ban thaw ïa ka jaka kaba shngaiñ ïa ki ïew ki hat ha Nongbah Shillong, da kaba rah ïa ki ïew ki hat sha ki jaka kiba la pynkhreh bad pynwandur, kiba don ïa ki paiñkhana bad kiwei-kiwei ki jingdonkam.
“Ngi dang trei sha ka bynta kaban long salonsar bad ka jingkyrshan ïa ka imlang sahlang” la ong u Myntri Rangbah.
