Shillong, Nailar 12
U Pa’iem Ainam Manik Syiem, u Syiem ka Hima Mylliem ha ka 12 tarik u Nailar 2026, um shym la pat ïoh ka lad ban shong ha ka shuki kum u Syiem, namar ba u Acting Syiem ba la thung da ka District Council, um shym la pat iehnoh ïa ka kam bad u la wan ban shongbeit ha ka shuki ha ophis ka Hima Mylliem.
Lah ban kdew ba ka jingthung ka District Council ïa u Alban Fedrik Syiem kum u acting Syiem ka Hima Mylliem, kadei hadien ba ka la sospon ïa u Ainam Manik Syiem, da kaba kdew ba ka Hima Mylliem kam siew ïa ka khajna sha ka District Council.
U Ainam Manik Syiem u la wan poi ha ka ophis ka Hima Mylliem naduh dangstep, hynrei um shym la pat ïoh ka lad ban trei ki kam, namar ba u Acting Syiem ba la thung ka District Council um shym la mih na katei ka ophis.
La sakhi ba u Ainam Manik Syiem u la hap ban mih noh na ka ophis treikam ka Hima Mylliem ha ka por 5 baje, namar ba u Alban Fedrik Syiem, um shym la mih satia na katei ka ophis.
Hadien ka por 5:30 eiei, u Acting Syiem u la mih noh na ka ophis ka Hima Mylliem bad ha ka jingpyrshang bad ïakren u la ong, ba un trei beit ïa ka kam haduh ban da ïoh ka hukum na ka District Council, ba un iehnoh ïa ka kam kum u Acting Syiem.
“Ngam don ei-ei hynrei namar ba ngam pat ïoh ka hukum na ka District Council, kumta nga wan shongbeit ha ka ophis ha Hima Mylliem bad ngan trei beit ki kam,” u la ong.
“Lada ngi la ïoh ka hukum na ka District Council ngi kloi ban mih, hynrei ngim pat ïoh ka hukum te ngin hap ban shongbeit. Ka ïingkashari ka phah sha District Council bad lyngba ka District Council kadei ban hukum ïa nga ban mih na ka ophis, namar ba ïa nga ruh la hukum ka District Council ban shimti ïa ka kam kum u Acting Syiem ka Hima Mylliem,” u la bynrap.
