Nongstoiñ, Nailar 13
Ka kynhun ANTF ha ryngkat ki pulit ka thanad Nongstoiñ hadien ka jingpynap shrip bad beh thong kaba jur ki la ïoh ban bat bad kem noh ïa ki suba nongkhaïi drok bad ïoh kurup kumba 10.81 gram u drok heroin.
U Superintendent of Police ka West Khasi Hills Bah Herbert P Kharkongor, MPS u la ong, ha ka sngi Palei ki pulit ka Nongstoiñ kila ïoh jingtip kaba thikna halor ka ïaid ka ïeng jong ki nongkhaïi drok kiba la suba jur ba ki dang thmu ban wan kit drok hapoh West Khasi Hills District bad na ka liang ki pulit ka ANTF ryngkat na thanad Nongstoiñ kila pynlong ïa ka jingpynap shrip ïa kitei ki nongkhaïi drok ha manla ki lad jong ki surok kiba poi shapoh ka district ha ryngkat ka jingïadonlang ki nongsakhi.
U SP u la ong ba kitei ki suba nongkhaïi drok ki dei kiba la tip kyrteng kum u Teilang Lyngdoh Nonglait, 35 snem bad u Pynkmenlang Kharjahrin, 31 snem bad kitei ki ar ngut kila pyndonkam ruh da ka taksi kamai kaba don ïa u registration number ML05-W-2576.
Shuh shuh u SP u la ong ruh ba mar ïapoi ha Nongjyllieh, katei ka kali bala pyndonkam da kitei ki suba nongkhaïi drok mar ïa ïohi ïa ka jingap khynra jong ki pulit, kila pyrshang ban phet krad hynrei na ka liang jong ki pukit kila beh kthong ïa ki bad kila ïoh ban bat ïa ka kali ha ka shnong Tynrongladew kaba don ha ka surok ban leit sha dewlynnong Nongkhnum.
U SP u la ong, katba ki pulit ki dang thmu ban kem ïa kitei ki suba nongkhaïi drok, u Teilang Lyngdoh Nonglait u la ïoh lad ban mih na ka kali bad phet krad na katei ka jaka bad bret ruh ïa kawei ka pla ha kaba ki pulit kila kthong haduh ba kin da ïoh bat ïa u bad ïa katei ka pla ruh la lap noh hadien ka jingleit wad ba u la ïalam ïa ki pulit.
La ong ruh ba ha ka jingkhynra ïa katei ka pla, ki pulit kila lap ïa kawei ka song synduk kaba don ki powder rong stem lam rongsoh bad hadien bala test la lap ba dei u drok Heroin uba khia kumba 10.81 gram, nalor kata sa uwei u klong plastik rit la lap na u Teilang Lyngdoh Nonglait bad haba la test ïa u powder ba don hapoh la lap ba u dei u drok Heroin u ba khia 0.09 gram katba na u Pynkmenlang Kharjahrin la ïoh uwei u klong plastik rit ba don powder bad haba la test une ruh u pyni ba dei u drok Heroin ba khia 0.07 gram bad ïa u drok la kurup noh da ki pulit ha ryngkat ka jingdon ki nongsakhi.
Shuh shuh ki pulit kila ïoh kurup ruh sa ïa kiwei de ki tiar kiba kynthup ïa ki thyrnia injek, ka pisa, kawei ka song synduk bad phra tylli ki klong plastik rit na ka jaka sah jong u Teilang Lyngdoh Nonglait hapoh ka jingleit ïalam ka jong u.
U SP u la ong ruh ba ki pulit kila kem noh ïa kine baroh ar ngut ki suba nongkhaïi drok bad pynngat ruh ïa ki hapoh ki kyndon ka NDPS Act.
