Shillong, Nailar 13
U Myntri Rangbah ka Jylla u Conrad K Sang-ma u la buh jingkylli ïa u nongïalam ka Congress u Bah Vincent H Pala halor ka jingnoh synñiang jong u ban pynbeit ïa ka jingeh jong ka FCRA, ha kaba u la kyntu ïa ki nongïalam ba kin pynleit jingmut ha ka kam ym ha ka saiñ pyrthei.
Haba jubab ïa ka jingkynnoh u Bah Pala ba ka MDA kan kyrshan ïa ka FCRA Bill ha Parliament, u Conrad u la ong ba ka FCRA Bill jong ka Sorkar Pdeng mynta ka don ha ka Joint Parliamentary Commit-tee bad ka jingkylli ban kyrshan ne ban pyrshah kan mih tang hadien ba la bishar bniah ïa ki jingtip ba bniah.
“Ka jingkylli ban kyrshan ne ban ym kyrshan ka mih tang hadien ba ngi la ïohi ïa ki jingtip ba bniah jong kano-kano ka Bill ne Act kyrpang. Mynta la phah ïa ka FCRA sha ka JPC,” u la ong.
“Ngam tip katno sien u Bah Pala u la ïakynduh ïa u Myntri ka tnad Kam Pohïing ka Ri u Amit Shah ne wat ban kyrpad ïa ki nongïalam jong u ban ïakynduh bad ïakren bad shim ïa kane ka mat ha ka kyrdan jong u Myntri Kam Pohïing. Kumta nga tharai ba ki kam ki long kiba kongsan. Ka jingkylli ka long kaei kaba phi la leh? Kaei ka bynta ne jingnoh synñiang jong phi bad kumno phi noh synñiang? u la ong.
U la pdiang sngewbha ïa ki jingpyrshang ba dang shen jong ki MLA ka UDP bad kiwei-kiwei ki nongïalam ka seng kiba la ïakynduh ïa u Myntri Kam Pohïing ka Sorkar Pdeng ban ïakren ïa ka FCRA.
“Nga sngewkmen shibun ba ki MLA jong ka UDP ki la leit ban ïakynduh ïa u Myntri Kam Pohïing bad ki la ïakren ïa ka FCRA. Nga la ïohi ïa kiwei pat ki nongïalam na kiwei pat ki seng saiñ pyrthei ba ki leit bad ïakynduh – kata ka dei shisha kaba kongsan kaba phi ïohi,” u la ong.
U Conrad u la bynrap ba ka jingthmu ba kongsan jong ka Sorkar Jylla ka long ban pynthikna ba ïa ka jingeh yn pynbeit bad ba ki briew kin ïoh jingïada.
