Nongpoh, Nailar 13
Ha kawei ka jingjia tyngkhuh kali ha ka janmiet jong ka sngi Balang, uwei u pulit Home Guard ula duh noh ïa la ka jingim hadien ka jingshah ban ha ki nar post ilektrik kiba la hap na ka kali Pick-up kaba la ïa tynrah bad kawei pat ka trok kaba kit ïa u Coke.
Katkum ka khubor ba la ïoh lum, la ïathuh ba katei ka jingjia ka dei kaba la jia ha ka por kumba 6:35 eiei janmiet ha ka surok Narbong jong ka thaiñ Byrnihat marjan bad ka surok bah National Highway 6 ha Ri Bhoi District.
La ïathuh ba utei u Home Guard uba la tip kyrteng kum u Bah Magelan Sohkhlet uba dang pynïaid kali ha katei ka surok ula ngat ha ka jingshah ban ha ki nar post ilektrik ka NE Zone kiba hap na ka kali Pick-up (AS25-EC-3468) hadien ka jingïa tynrah bad ka trok kit Coke (AS01-FC-9640) kaba la ñiah da u Bah John Paul Khardewsaw na ka shnong New Nongstoiñ.
Ha katei ka jingjia, utei u Home Guard uba dei na ka shnong Pahamsohthri, u la ngat ha ka jingmynsaw jur bad la pynkit noh mar mar sha Byrnihat PHC na ka bynta ban pynïoh ka jingsumar, hynrei ki doktor kiba don ha katei ka jaka ai jingsumar ki la pynbna ba u la dep ban khlad lypa.
La ïathuh ba u nongñiah katei ka kali Pick-up uba la tip kyrteng kum u Gandhi Kalita na ka shnong Paschim Boragaon, Kamrup Metro, Assam, u la phet krad noh hadien katei ka jingjia bad leit ban pyndem pat hakhmat ki pulit ka Byrnihat hadien katto katne por.
Hadien ba la pyndep ïa ki jingdonkam katkum ki kyndon aiñ, ki pulit ki la aiti noh ïa ka met jong utei u Home Guard sha ki bahaïing hasem ba kin pyndep ïa ka jingleh niam khatduh bad ka jingtohkit halor kane ka jingjia ka dang ïaid shakhmat.
