Shillong, Nailar 13
Ki nongïalam ka Hynñiewtrep Integrated Territorial Organisation (HITO), East Khasi Hills ha ka Sngi Palei ki la leit ban khynra ïa ki bar Jylla kiba trei bylla ha ka shnong Tynring, East Khasi Hills District, ha kane ka jingkhynra la lamkhmat da u Bah Arko Syiemlieh uba dei u EC Member jong ka East Khasi.
Hadien ba ka HITO ka la ïoh jingtip ba don ki nongtrei bar jylla kiba wan rung na Assam, ki dkhot ki la leit ban pynshisha, ha kaba la shem ba don napdeng jong kitei ki nongbylla kim don ïa ki kot ki sla kiba biang lane kum ki kot jingpynshisha na thanad, ha kaba ka HITO ka la shim ïa ka sienjam ban beh krad ïa kine ki briew.
U Bah Arko Syiemlieh haba kren u la pynpaw ba ka jingwan rung katba mon ki briew kiba nabar ka ktah shibun ïa ki khasi haba ïadei ka jingshngaiñ bad ka jingshah knieh noh ïa ki kam ki jam, u la ban ruh ba ka HITO kumba ka ju peit pyrman ïa ka jingwan rung ki briew kiba nabar, kan nang ïaibteng ban pynlong ka jingpeitngor.
Ka HITO ka kyntu ïa ki trai jaka kumjuh ki trai ba ai kam ïa ki briew kiba nabar ba kin bud ryntih ïa ki kyndon jong ka Sorkar da kaba ban ba na ka por sha ka por kan pynlong ïa ka jingkynra ïa ki nongtrei bar jylla.
