Shillong, Nailar 16
Ka ophis Shillong Municipal Board ha ka sngi u Blei ka la pynmih ïa ka jingpynbna (Notice) sha ki nongshong die madan harud surok ba ha Laitumkhrah, Dhankheti, Malki, Laban, Redcross, Barik Phan-nonglait park, Lumshatsngi, Rilbong ba ki dei ban kynriah noh sha ki jaka ba la pynmang kyrpang ka Sorkar ha shuwa lane ha ka 17 tarik Nailar 2026.
Katkum ka jingpynbna, la kdew ba ka Town Vending Committee (TVC) ka la pynlong ïa ka jingpeit bniah (Survey) haba ïadei ki nongdie madan ba katkum ki kyndon jong ka Meghalaya Street Vendors (Protection of Livelihood and Regulation of Strect Vending) Scheme 2023, ïa kaba la lah ban pyndep ha u bnai Kyllalyngkot jong u snem 2024. Haba la pyndep ban bud ryntih ïa ki kyndon ba la bthah, Kham hadien la pynmih ruh ïa ka thup kyrteng jong ki nongdie madan kiba la mynjur da Provisional Town Vending Committee (PTVC).
Ka Sorkar Jylla ha ryngkat ka jingai jingmut jong ka Town Vending Committee mynha ka 15 tarik u Ïaïong 2026 ka la pynmih ïa ka jingpynbna ba ki nongdie madan ha thaiñ Laitumkhrah, Dhankheti, Barik, Phan-nonglait Park, Redcross, Laban, Lumshatsngi ba kin kynriah noh sha ka jaka ïeng kali jong ka Shillong Municipal Board ha Dhankheti bad sha phyllaw jong ka Brightwell Bungalow.
La kdew ba ka bor synshar shnong, hapoh ka jingbthah jong ka Sorkar, ka la shim shimkhia ban pynbha ïa kine ki jaka ban shong ki nongdie madan bad ban pynbit pynbiang ïa ki jingdonkam ba kongsan ha kine ki jaka ba lah pynbeit da ka Sorkar.
Shuh-shuh, katkum ka jingpynbna ba la pynmih ha ka 20 tarik Rymphang 2026, ka la pynbna kum ka “No Vending Zone” baroh shilynter ka surok ha ki thaiñ Laitumkharh, Dhankheti, Malki Point, Barik, Phan-nonglait Park, Redcross, Laban, Lumshatsngi bad kane kan treikam mar dor na ka bynta ka jingbit jingbiang paidbah nongleit nongwan kumjuh ka jingïaid beit ki kali ha surok. Kumta la la khang pyrshah ïa ki nongdie madan ban die jingdie ha ki jaka ba la kdew.
Ka Sorkar lyngba kane ka bthah ïa baroh ki nongdie madan kiba don ïa ki Certificate of Vending (COV) ba ki kynriah noh ïa ki jingdie jongki sha ka jaka ba la buh kyrpang ka Sorkar, “Kiba ïaleh pyrshah ne bym kohnguh ïa kane ka jingbthah kin ngat ha ka jingpynshitom ba katkum ki kyndon jong ka Meghalaya Street Vendors (Protection of Livelihood and Regulation of Strect Vending) Scheme 2023. Kino-kino ki mar ne ki jingdie ba lap ha ki jaka ba la pynbna “No Vending Zones” hadien ka tarik ba la buh kin shah weng” la ong ha ka jingpynbna.
