Shillong, Nailar 16
U Bah Mossklander Marngar, President ka Meghalaya Commercial Trucks Owners and Drivers Association (MCTODA), u la pynpaw ka jingsngewkhia halor ka jingbteng ban ïoh ki bar jylla ha ka kam kit mar na ki karkhana pynmih dewbilat, katba ki trai jylla pat kim ïoh ïa kane ka kam.
Ia kane u Bah Mossklander u la kren sha ki lad pathai khubor hadien ba la kut ka jingïalang, kaba ki ju ïakynduh lang kaba shisien ha ka shi bnai, kaba la long ha Laitkor.
U Bah Mossklander u la ong ba ka jingdon jong kine ki karkhana dewbilat, ka long ba ka jingïoh nong kadei beit sha ki kali bar jylla. Ka jingïoh nong kadei ki karkhana bad ki kali kiba na bar ka jylla.
Kine ki kali kiba nabar jylla, la kumno-kumno ki kit kumba 15 spah tylli ha ka shi sngi ha ka kit dewbilat, hynrei ki 3 tylli ki Association jong ngi kiba la don lypa ki ïoh tang kumba 120 tylli. Kane ka la pynjynjar bad pynsohsat bha ïa ngi, namar mynta kiba bun ki la thied kali bad ki la shu ïeng khlemïoh kit mar, u la ong.
“Ha ka jingïalang , ngi la ïakren ban ai lad ïa ki kali ban na ka jylla, ba kin ïoh kit mar man ka sngi, bad kaba nyngkong eh nga ïohi ba ki District Council kidei ban shimkhia namar mynta da ki hajar tylli ba ki Council ki ai lisen ïa ki kali kiba nabar. Kane ka jingai lisen ki Council ka pynjynjar ïa ki paradoh parasnam jong ngi, kiba imja da kaba niah trok,” la bynrap u Bah Mossklander .
Kumta u la ong ba ka MCTODA, ka la rai ban leit kyntu, khamtam ïa ka Jaiñtia Hills Autonomous District Council, ba kadei ban wengnoh ïa ki trading lisen ban ai ïa ki kali ba nabar.
