Shillong, Nailar 16
Ki khynnah skul jong ka Phudmuri Presbyterian Higher Secondary School ki la shimbynta shitrhem ha ka jingpynkhuid ïa ki sawdong sawkun (Cleanliness Drive) jong ka Skul, kiba wan ban shimbynta ki don palat phra phew na ki kyrdam pule klas IX, XI bad XII.
Ïa kane ka jingpynkhuid skul ba pynlong ha ka 14 tarik u Nailar 2026 ïa kaba la bei tyngka da ka Sorkar Jylla hapoh jong ka Chief Minister’s Youth for Green Campaign Movement 2024-25 lyngba ka ophis u Deputy Commissioner ka East Khasi Hills District ha ka jingpynlud kaba T. 20,000 (Ar Phew Hajar Tyngka) na ka bynta kane ka kam.
Ki Khynnah skul ki la pynkhuid ïa ki sawdong sawkun jong ka skul da kaba phut ïa ki ñuit bad ki jaboh jabaiñ shabar ka kynroh ka skul bad ki jaka kiba marjan. Ki khynnah ki la ïashim bynta ruh ha kaba shna ïa ka sboh khyndew ban thung ïa ki syntiew ha ki jaka ba la shna hapoh ka skul.
Ki khynnah ki la ïashim bynta shitrhem da kaba pynpaw ïa ka jingkitkhlieh ban wanrah ïa ka jingkhuid jingsuba hapoh ka skul bad shabar ka skul kumjuh.
Ka skul ka pynpaw ïa ka jingsngewnguh ïa ka Sorkar kaba la bei tyngka kumjuh ruh ïa ka Dorbar Shnong Mawlai Phudmuri kaba la shah sngewbha ïa ka skul ban pynlong ïa kane ka prokram hapoh ka shnong.
