Shillong, Nailar 16
U MLA ka North Shillong Constituency u Bah Adelbert Nongrum u la pynpaw ka jingpyrshah haba ïadei ka jingthmu ka Sorkar Pdeng ban wanrah jingpynkylla ïa ka Foreign Contribution (Regulation) Act (FCRA) kaba long shi bynta ban khanglad ïa ki jingïarap kiba wan nabar.
Haba kren u Bah Adelbert kyntu ïa ki para Khristan ba kin long kiba ïatylli kawei khlem da tieng ne riej ban pynpaw ïa ka jingsngewkhia haba ïadei ki jingthmu ki bor ba nabar ban ñion beiñ ïa ki khun khristan. “Ngim dei ban klet ba ki ‘Missionary’ ki la noh synniang shibun ïa ka Jylla kumjuh ïa ka Ri broh kawei” u la ong.
Haba ïadei ka jingrakhe ïa ka sngi laitluid ba 80 jong ka Ri u la ong, “Ai ba kane ka jingrakhe ïa ka Sngi laitluid jong ka Ri India kan long kaba shisha bad kaba pyni shisha ïa kata ka jinglaitluid, ka jingïatylli bad jinglong kawei jong ki Jylla bapher-bapher kaba pynlong kawei ïa ka Ri India, namar kata ka Sorkar Pdeng ruh ka donkam ïa ka jingïaburom kaba markylliang.
U Bah Adelbert u la ong, lada kita ki nongïalam jong ki sengsaiñ pyrthei kiba don ha ka Sorkar Pdeng kin peit bad kin pynthikna ïa ka jingshongsuk shong shngaiñ jong ki nongshong shnong ki jingshah ñiew beiñ kim dei shuh ban dang ïai bteng.
