Shillong, Nailar 16
Ka komiti jong u Justice BP Katakey ha ka kaiphod shipor kaba 39 jong ka, ka la pynpaw ïa ki jingbymïahap ïa ka jingdon ki Coke Oven Plant ha South West Khasi Hills district bad ka la bthah ïa ki bor synshar District ban pynlong ïa ka jingtohkit ba thymmai halor ka jingtreikam jong ki bad ka jingpynmih dewïong.
Ka komiti ka la bthah ban jurip ïa ki Coke Oven Plant ha ka district hadien ka jingkynnoh ba dang bteng ban tih dewïong beaiñ.
Ïa ki jingpeit bniah la pynlong ha ka 01/06/2026 ha ka jingdon lang ka kynhun ki ophisar bad ki nongmihkhmat jong ki karkhana.
Ka kaiphod jurip, kaba la pynkhreh da ka B. Kharjana, MPS kaba la aiti lyngba u Superintendent of Police bad u Deputy Commissioner to the secretary, ka tnad Mining and Geology mynha ka 17/06/2026, ka long katkum ka jingpeit bniah ka committee.
Katkum ka kaiphod jong ka bor synshar District, 10 tylli ki Coke Oven Plant ki don ha South West Khasi Hills.
Na kine, 3 tylli ki dei ki bym treikam namar ba kim shym la ioh ïa ka Consent To Operate na ka Meghalaya State Pollution Control Board.
Hynrei ki jingtip ba la ai da ka MSPCB ha ka jingïalang kaba long ha ka 29/06/2026 ki pyni ba la ai ïa ka Consent to Establish na ka bynta 15 tylli ki karkhana.
Na kine, la ai CTO sha ki 10 tylli ki karkhana, katba 5 tylli kim shym la aplai CTO.
Ka komiti ka la kdew ïa ka jingïapher hapdeng ka jingkheiñ jong ka district kaba don 10 tylli ki karkhana bad ka rekod jong ka MSPCB kaba don 15 tylli bad ka la ong ba donkam ban wad bniah shuh shuh ban pynshisha kino ki karkhana kiba la buh shisha katkum ki CTE ba la pynmih da ka MSPCB.
Katkum ki rekod jong ki district, 7 tylli ki karkhana ki dang treikam mynta. Kine ki kynthup ïa ka M/s Sentina, M/s Nimon Enterprise, M/s S.F. Nongbri Enterprise, M/s Phusngi Nongbri Enterprise, M/s Badri Brothers Coke Industry, M/s South West Carbon bad ka RSS Coke.
Ka kaiphod ka ong ba u dewïong uba pyndonkam da ki katto katne ki karkhana u dei uba la shim na shabar ka jylla, don napoh ka jylla, bad don na baroh ar.
