Mawkyrwat, Nailar 17
Ki riew rangbah jong ka Hima Langrin sa shisien ki la khot bad wer ïa ki paidbah kynthup ïa ki shynrang bad kynthei, ki longkmie longkpa kiba dei ki khun ki hajar ka hima Langrin ba kin ïa mih paidbah ha ka 19 tarik u Nailar 2026 ban leit tur biang sha ophis treikam ka Khasi Hills Autonomous District Council (KHADC) ban dawa weng mardor ïa u Nongtei Syiemiong na ka khet Syiem.
Kine ki riew rangbah naduh u Bah Fineness Syiemiong, Bah Adira Lyngdoh, Bah D Syiemiong bad Bah Beforelan Nonglang ki la pynpaw ïa ka jingbym sngewhun ïa ka jingsynshar u Pa’iem Nongtei Syiemiong da kaba kynnoh ba u dei u Syiem uba leh donbor bad uba kam ri kynti ïa ka khyndew jong ka hima. Ki la ong ruh ba ka jingmih ka huri hura ha ka 7 tarik u Nailar 2026 ha Phlangdiloiñ kaba la wanrah ruh ïa ka jingmynsaw ki paidbah bad ki pulit ka dei namar ka jingleh donbor jong u Syiem ha kaba um shym la ailad ïa ki paidbah ba kin kren bad pan jingpynshai ha kaba ïadei bad ki kam ka hima. Shuh shuh ki la ong ruh ba ki khun ki hajar ki da kwah eh ban ïoh ka jingpynshai na u Syiem ha kaba ïadei bad ka jingpyntreikam ïa ka Management Board, hynrei ha kato ka sngi um shym la pynshai eiei bad u la pynkut jubor ïa ka dorbar bad kane ka jingleh jong u ka la pynbitar ïa u paidbah. Ki la ong ruh ba kane ka jingleh jong u Pa’iem Nongtei Syiemiong ka dei ka bym pat ju jia koit ha ka histori jong ka hima Langrin ha kaba u Syiem un khot hi ïa ki khun ki hajar sha ka Dorbar Pyllun hynrei ynda ki paidbah ki la wan, u wanrah pynban da ki seng longkmie, ki pulit bad security guard ban ap pahara bad khanglad ïa ki paidbah ban leit sha ka dorbar.
