Nongstoiñ, Nailar 17
Ka kynhun ki nongshet Ja (Midday Meal) ïa ki khynnah skul ïa kaba la tip hapoh ka shatri kum ka Union of Cook Cum Helper PM Poshan Meghalaya hadien ka jingïakren ba sani bha, kala shim ïa ka rai ban ïakhih tyngeh da kaba sangeh treikam noh shuwa shipor tad haduh ba ka Sorkar kan shimkhia ïa ka kam namar ba ka jingïakhih kaba jai jai haduh mynta ka la kynjoh sha ki 20 snem.
Ïa kane ka rai la shim ha ka sngi Nyngkong jong ka taiew ha ka jingïalang jong ka Central Executive Committee kum kawei na ki dorbar bah ki nongshet ja sngi kiba na ka jylla Meghalaya kaba la long ha Dorbar Hall Riangdo Mawshynrut Civil Sub Division.
Ïa kane, la pynthikna ruh da ki nongïalam ka seng ba kynthup ïa u Bah Khroo L Pariat Adviser Sengkmie, bad ka Kong Gina Nengnong President na ka Sengkmie jong ka Union of Cook Cum Helper PM Poshan Meghalaya haba kren bad ki nongthoh khubor hadien katei ka jingïalang.
Kine ki nongïalam ki la pynpaw ruh ïa ka jingeh namar ka jingsiew dor rit palat ka Sorkar ïa ki dkhot jong ka seng ha kaba kat haduh kine ki sngi, ki dang ïoh tang 2 hajar tyngka shi bnai kumta ha kum kane ka juk kaba la kiewdor lut ki jingdonkam ka la shem jingeh ban pyndap na ka bynta ka lut ka sep ha la ïing. Ki la ïathuh ba ka seng ka la dep ruh ban ai da ka jingthoh sha ki bor kiba halor jong ka Sorkar Jylla bad ka Sorkar Pdeng hynrei kat haduh mynta mynne ka seng kam pat ïoh kano-kano ruh ka jubab.
Ki la bynrap ruh ba hadien ka jingïatai bniah kaba jur ka la mih lang tang kawei ka sur bad kata ka long ban ïakhih tyngeh da kaba shim ruh ïa ka rai ban sangeh treikam noh shuwa shipor tad haduh ba ka Sorkar kan da shimkhia ïa kane ka kam namar la ong ba ka jingïakhih kaba jai jai haduh mynta ka la kynjoh sha ki 20 snem.
Ym tang katta, hynrei ka seng ka la ong ruh ba lada ka Sorkar kan pyrshang ban ai noh sha ki NGO ne kino-kino ki seng treimon sngewbha ban pyntyllun ïa ka kam ne ka scheme PM Poshan, ka seng kan ïeng pyrshah da ki jingïakhih kaba tyngeh bad haba ïadei bad kitei ki rai ka seng ka la ong ba kan sa leit ai da ka jingthoh sha ki bor kiba halor jong ka Sorkar Meghalaya bad sha ka Sorkar Pdeng namar ki mat jingkyrpad ne ki jingïakren ki la ïaid naduh u snem 2019.
Shuh shuh ki la pyntip ruh ba ka jingsangeh treikam kan sdang naduh ka 1 tarik u Nailur 2026 uba dei u bnai ban wan tad haduh ba ynda pynbeit biang sa da kumwei namar lada ka Sorkar kan shah shkor, kin sdang bteng treikam biang lym kumta kin kheiñduh ïa la ka kam namar ym lah shah shuh, la ong ki nongïalam ka seng.
Ha kane ka sngi la donlang ruh ki nongshet Ja (Midday Meal) na baroh ki District bapher-bapher kynthup ïa kiba na Ri Bhoi, Jaiñtia, Khasi Hills bad ruh na kiba ka Garo Hills District.
