Shillong, Nailar 17
Ki nongdie madan kiba shong die jingdie harud surok bad lynti ïaid kjat ha Laitumkhrah bad Fire Brigade, ki la pynpaw ka jingbitar hadien ba ki la kohnguh ïa ka jingbthah ka Sorkar ban kynriah noh sha ki jaka kaba la pynkhreh ïa ki, kata ha Brightwell Bungalow bad Dhankheti.
Ka jingbitar ki nongdie madan ha kitei ki thaiñ, kadei hadien ba ki la poi ha ki jaka kaba ka Sorkar ka la pynkhreh na ka bynta jong ki bad ïohi ïa kiba bun ki jingduna ym kumba ka la kular ïa ki.
Ha ka jingïakren bad ki nongdie madan ha ka janmiet jong ka sngi Nyngkong jong ka taïew, ki la pynpaw ka jingbitar da kaba ong “Ka jingwan ki pulit ha Laitumkhrah ha ka por mynstep, la i kumba kidei ki lehnoh bad nongtuh”.
Ki la ong ruh ba ha katei ka jaka, ki dang bun ki dukan kiba dang shna haduh mynta nalor ka jingbymbiang ki jaka leit shabar, ka bording, ka jingrit ki dukan bad kiwei-kiwei de ki jingduna.
“Lada ngi kohnguh ïa ka Sorkar ruh ka pynman ba ki la pyndem tdong bad lada ngi pyneh ruh, ngi shah ong ba ngi dei ki ksew lymwir,” ki la ong.
“Ngi pynrem shisha ïa ka Sorkar mynta te, namar ïa ki nongdie madan la wan ban pahara da ki ba bun ki pulit ha surok. Hooid shibynta ngi pynpaw ka jingsngewnguh ba ka Sorkar ka la ai kane ka jaka, hynrei ka jingphah pahara ïa ki pulit ngi pynrem,” la ong ki nongdie madan.
Namarkata, ki la ong ruh ba ka Sorkar, kadei ban weng ïa ki ynda la dep pynbha bad shna lut nadong shadong ki dukan, hynrei mynta pat ynda la wan ha kane ka jaka ba ai ka Sorkar, tang ka jingshna ïa ki dukan ruh ym pat dep.
“Ngi dangmut ba ka Sorkar ka la dep lut baroh ki jingdonkam na ka bynta ki dukan ba ngin shong hynrei haba ngi wan poi ha kane ka jaka, kam shym la pat pyndep lut. Ka um kam pat don, ka jaka leit shabar kam pat don, bad kiwei-kiwei, kumno ka Sorkar ka shu kular kai ïa ngi ba la dep pynbiang lut. Kumta ngi pynpaw ka jingpyrshah ïa ka Sorkar,” la bynrap biang ki nongdie madan.
Nalorkata, ki la byrngem ruh ba lada kan long kumne, kin hap ban leit shong biang sha Laitumkhrah.
