Shillong, Nailar 17
Haduh san ngut ki briew na Meghalaya, kynthup arngut ki khynnah, ki dei napdeng ki phra ngut kiba ïap ha ka jingpluh ding hapoh ka Hotel Bideshinii hajan thanad Tarapith, kaba hap ha Birbhum district ka West Bengal kaba la jia ha ka janmiet sngi U Blei.
Ha kane ka jingkem ding ha ka janmiet sngi U Blei, ki kynhun ai jingïarap bad ki Pulit pynlip ding kila hiar wut wut sha katei ka jaka ban ïarap pyllait im ïa ki briew hynrei ka jingklang jong ka ding, ka la ïoh ban shim noh ïa bun ki mynsiem briew.
Ki san ngut ki nong Meghalaya kiba ïap ki dei kiba la ithuh kum u Rajendra Nath, Asha Nath, Buran Madak, Shivraj Madak (10) bad Aushnath Madak (8). Baroh kine ki dei ki nongshong shnong ka Dalu ha West Garo Hills, Meghalaya.
Ïa kine ki lanot la ïoh ban pyllait na ka ding hynrei namar ka jingmynsaw jur, ki doktor kila pynbna ba kila khlad noh.
Katkum ka jingong ki bor Sorkar, ki kynhun ai jingïarap kila ïoh ban pynlait haduh 34 ngut ki briew na kane ka jingjia pluh ding.
Ha kawei pat ka liang, u Myntri Rangbah ka Jylla u Conrad K Sangma u la pynpaw ka jingsngewsih kthang bad ka jingkyndit kaba khraw halor ka jingduh noh ki 5 tylli ki mynsiem briew na ka Jylla Meghalaya ha ka jingpluh ding kaba shyrkhei ha ka Hotel Bideshini Yatri Nibas jong ka Tarapith, Birbhum district, West Bengal.
U Myntri Rangbah ka Jylla u la ong ba ka Jylla baroh kawei ka ïeng ha ka jingsngewsih ryngkat bad ki bahaïing hasem jong kiba la khlad bad 6 ngut kiwei pat ki briew na West Garo Hills ki la lait im na katei ka jingjia ba sngewsih.
“Kane ka dei ka jingsngewsih kaba ym lah ban mutdur na ka bynta ki longïing. Ngi la duh noh ïa ki nongshong shnong na Meghalaya, kynthup ïa arngut ki khynnah rit, ha ka jinglong kaba sngewsih tam. Na ka liang ki paidbah ka Meghalaya, nga pynpaw ïa ka jingsngewlem kaba khraw sha kiba haïing hasem jong kiba la khlad noh ha kane ka kynta jong ka jingsngewsih,” ong u Myntri Rangbah.
Ka ophis jong u Additional Resident Commissioner, Meghalaya House, ka la ïatreilang bad ki bor pynïaid District jong ka Birbhum ban pynthikna ïa ki jingtip ba pura shaphang ki longïing kiba la shah ktah bad ban ai ïa baroh ki jingkyrshan bad jingïarap kiba lah ban long, kynthup ban pynsuk ïa ka jingkit ïa ki metïap jong kiba la khlad noh sha ka jaka ba ki sah.
U Myntri Rangbah u la pynbna ruh ïa ka jingïarap pisa ne ka ‘ex-gratia’ kaba long mar T.2 lak na ka Sorkar Jylla sha ki bahaïing hasem jong uwei pa uwei na ki san ngut kiba la khlad noh na Meghalaya, kum ka dak jong ka jingsngewlem bad jingkyrshan ha kane ka por kaba eh.
