Shillong, Nailar 17
Ki bor distrik ka East Khasi Hills ha ka Lah Sngi U Blei ki la pynlong ïa ka jingjurip lang ïa ka Lum Survey hadien ki jingsngewkhia halor ki kam be-aiñ bad ka jingkhaïi drok ha katei ka thaiñ.
U Deputy Commissioner ka East Khasi Hills, u Abhilash Baranwal u la ïathuh ba kane ka kynhun jurip ka kynthup ïa u SP, ADM, CEO Cantonment bad ki ophisar na ka MeECL.
Haba kylli la hato ki bor distrik kin kyndang ne em ïa kito kiba shong be-aiñ ha katei ka jaka, kaba hap hapoh ki jaka ‘Cantonment’, u DC u la ong ba kam long kaba lah ban leh ïa kane ïa mynta.
“Ym lah ban kyndang. Ka don ka hukum jong ka Ïingbishar High Court ban pynsangeh ïa kane. Ha kajuh ka por, ka dei ka jaka ka ‘Cantonment’,” u la ong.
Halor ki lad ban talasi ïa ki kam be-aiñ ha Lum Survey, kaba la ithuh kum kawei na ki jaka pdeng ba jyllei u drok ha Shillong, u Baranwal u la ong ba yn nang pynjur shuh-shuh ïa ka jingkhynra.
“Ha kaba ïadei bad ki kam be-aiñ, ki jingkhynra ba man ka por ki dang ïaid shakhmat. Ngin pynjur ïa kane kajuh ïa mynta,” u la bynrap.
