Shillong, Nailar 17
U P.K Boro, Chief Executive Officer (CEO) ka Shillong Municipal Board (SMB) u la ong ba ka jingpynkynriah ïa ki nongdie madan na Laitumkhrah sha Dhanketi bad Brightwell, ka long kaba la ïaid beit ïaid ryntih.
Ïa kane u P.K Boro, u la kren sha ki lad pathai khubor ha ka 17 tarik Nailar 2026, ha kaba u la wan lang ban sakhi ïa ka jingpynkynriah ïa kiba die madan na kitei ki thaiñ.
“Watla ka la don ka jingpyrshah na kiba die madan ha Laitumkhrah kaba da ki taïew, hynrei mynta ka sngi ka jingpynpra bad weng ïa ki dukan ka la ïaid beit ïaid ryntih shakhmat,” u la ong.
“Ki nongdie madan na Laitumkhrah ki kohnguh ïa ka jingbthah ka Sorkar ban kynriah sha ki jaka ba la pynkhreh na ka bynta jong ki,” u la bynrap.
U P.K Boro u la pyntip ruh ba ki don haduh 86 ngut ki nongdie madan na Laitumkhrah bad ïa kine baroh la pynkynriah ban leit shong ha Dhanketi bad ha Brightwell.
Haba kylli halor ka jingthmu pynkynriah ïa kiba die madan ha Jail Road, u P.K Boro u la kyntait ban kren eiei, hynrei u la shu ong, ba kadei la ka jong ka mat ban pynkynriah.
