Jowai, Nailar 17
Ki katto katne ki longïing ha ka shnong Lapangap, West Jaiñtia Hills District ha ka step jong ka 15 tarik Nailar kaba dei ka sngi rakhe ïa ka jingdap 80 snem ka jingïoh laitluid ka ri India ne Independence Day, kila pynher da ki lama ïong hakhmat ïing jong ki.
Haba ïakren bad u Waheh Shnong Ma Deimonmi Lyngdoh, u la ïathuh ba katei ka jingpynher lama ïong kam dei satia ka rai jong ka Dorbar Shnong, ka dei ka rai shimet jong kitei ki longïing.
Hynrei u la suba ba ka jingpynher lama ïong, ka lah ban dei ka jingpyrshah jong ki halor ka jingïoh jong ki Karbi ban rep ban riang ha u Lum Pynthor ka shnong Lapangap.
Lah ban kdew ba mynta u snem 2026, ki nongshong shnong ka Lapangap kim shym la ïohlad satia ban hiar rep sha ki pynthor jong ki, kiba don markhap bad ka shnong Tahpat namar ka jingshah ther da ka jri siat sim ha ki Karbi jong ka shnong Tahpat.
Hynrei kane ka jingïoh lad ban hiar rep biang, ka la urlong hadien ka jingïalang ki heh Sorkar ka Meghalaya bad Assam kaba la long ha ktem ki pulit Assam kaba don ha Pynthor Lapangap ha ka 2 tarik Jylliew, 2026.
Ha katei ka jingïalang la mynjur ba ki Lapangap kin bteng ïa ka kam rep ha Pynthor naduh ka 3 tarik Jylliew bad ban pynneh ïa ka shongsuk shong shngain.
La rai ruh ban rep lang, ha kaba ki Lapangap kin ïoh rep ha ki lyngkha pynthor katba ki Tahpat kin rep ha ki jaka lum hajan ki lyngkha bad ba kin rep ïa ki jait jingthung bym neh junom.
Ïa kane ka soskular la soi ha ka jingdon ryngkat jong saw ngut ki IAS ophisar jong ka Jylla kata u Principal Secretary Bah FR Kharkongor, Commissioner & Secretary Bah CVD Diengdoh, u Secretary Bah GNS Dykes, u DC West Jaiñtia Hills District u Abhinav Kumar Singh bad ha ka jingdon ryngkat ruh u Co-Chairman ka Meghalaya State Law Commission bad u muktiar Bah Erwin K Syiem Sutnga.
Hynrei namar ka jingbym kdew shai ha ka soskular haduh katno ka jaka kin ïoh lad ban rep ki Tahpat, kumta ki Tahpat ki la shim kabu da ka pyndonkam ïa ki tractor bad puh shi lum ban prat khyndew ha Lum Pynthor kaba ha Lapangap hapoh West Jaiñtia Hills District, Meghalaya.
Ki katto katne ki nongshong shnong jong ka shnong Lapangap kila pynpaw ïa ka jingsngewkhia bad pyrshah jur halor ka jingpyndonkam jong ki Karbi da ki kali tractor ban lur ïa u Lum Pynthor jong ka shnong Lapangap na ka bynta ban pyndonkam ha kaba rep ban riang.
