Shillong, Nailar 17
Ka Meghalaya Commissionerate of Food Safety ka la weng noh ïa ka jingkhang ba shipor (jong ka) ha baroh kawei ka Jylla halor ka jingdie, jingbuh bad jingsam ïa ka jingdih “STING – Energy Drink”, da kaba ong ba ka jingtohkit kam shym la pynshisha ïa kano-kano ka jingïadei hapdeng ka jingdih ïa kane ka jingdih bad ka jingïap jong uwei u samla pule.
Kane ka hukum kaba la pynmih ha ka 15 tarik Nailar, 2026 da u Commissioner of Food Safety, u Dr. Joram Beda, ka la treikam mardor.
Ha ka 14 tarik u Nailar, ka tnad ka la pynjari ïa ka jingkhang ba shi por halor ka “STING” hadien ba la mih ki khubor ha ki lad pathai jong ka thaiñ, ha ka 12 tarik u Nailar, 2026, ha kaba ïadei bad ka jingïap jong uwei u samla pule ba la kynnoh ba ka don jingïadei bad ka jingdih ïa utei u jingdih ba don ‘Caffeine’.
La ïoh ruh ïa ki jingpynsngew kiba kyrpad ïa ki bor pynïaid ka ‘Food Safety’ ban khmih bniah ïa kane ka kam bad ban khang shipor ïa ka jingdie ïa kane ka jingdih katba dang ap ïa ka jingpynshisha.
Da kaba kdew ïa ki jingsngewkhia ha ka liang ka koit ka khiah ki paidbah, ka Commissionerate ka la pynjari ïa ka lad jingïada “katba dang ap ïa ka jingtohkit bad jingpynshisha,” da kaba pynshai ba kam don kano-kano ka jinglap ba katei ka jingdih ka dei ka daw kaba la ïalam sha katei ka jingjia ne ka don ka jingpynkheiñ ïa ka Food Safety and Standards Act, 2006.
Ka tnad ha kajuh ka por ka la hukum ban tohkit da u ophisar ka Food Safety, Tura, ban pyntikna ïa ki jingshisha. Ha ka kaiphod tohkit ba la aiti ha ka 14 tarik u Nailar, u ophisar u la pyntip ba ka jingtohkit “kam shym la pynshisha ïa kano-kano ka jingïadei hapdeng ka jingdih ïa ka ‘STING Energy Drink’ bad katei ka jingïap”.
Hadien ba la khmih bniah ïa ka kaiphod bad kiwei-kiwei ki jingdonkam kiba la lum thup ha ka jingthoh, ka Commissionerate ka la ong ba “ym don nongrim namar katei ka jingjia ba la kdew haneng, na ka bynta ban bteng ïa ki jingpyrkhing ïada ba shipor”. La pynmih ïa ka jingpynshai. Ka hukum ka la ong ba ka jingweng noh ïa ka jingkhang ba shipor ka long beit katkum ki jinglap jong ka jingtohkit kaba ïadei bad ka jingjia ba la kdew.
Shuh shuh ka Commissionerate ka la bthah ïa baroh kiba pynïaid ïa ki kam khaïi marbam ba kin ïai bteng ha ka ban bud bad kohnguh ïa ki kyndon jong ka Food Safety and Standards Act, 2006, bad ki kyndon kiba ïadei bad kane.
