Shillong, Nailar 18
Ka Project Director ka Meghalaya Aids Control Society (MACS), ka Dr. K.L Iawrod ka la ong ba ka jingkren jong ka, ba kawei ka daw jong ka jingsaphriang u khñiang jingpang HIV ha ka Jylla, kadei na ki nongñiah trok kadei na ka jingshongkha pathar, namar ki nongñiah trok kiba trei shabar, kim ïoh ban wan phai ïing shi bnai ne ar bnai.
“Ynda haba ki nongñiah trok ki wan phai ïing, ki wanrah bad u khñiang jingpang na ka jingshongkha pathar bad kane ka pynlong ban pynsaphriang ïa une u khñiang jingpang HIV,” la ong ka Dr. K.L Iawrod haba kren sha ki lad pathai khubor ha ka sngi Ba-ar jong ka taïew.
Ka la ong ba halor ka jingpynsngew ka MCTODA ïa ka jingeh jong ki na ka liang ka tnad kan pynlong ïa ka jingïalang kaba bniah bad kan sa rah ïa kane sha ki bor bahalor.
“Haba u briew u leit shongkha bad ka briew ba don ïa u jingpang HIV, bad haba u la shongkha sa bad ka lok ha ïing, ka jingpang kan bteng bad kan ngat sa ha u khyllung ruh ynda la kha. Lada ngi la tip ba la don kane ka jingpang, ngi dei ban shimkhia ban leh test, khnang ban lait ka jingsaphriang sha kiwei pat,” la bynrap ka Dr. K.L Iawrod.
Shuh shuh ka la ong ba kiba ïoh ïa u khñiang jingpang HIV ki tlot bor bad kim lah ban ïaleh pyrshah lada wan kiwei pat ki jingpang, namar ka bor ïada na ka met lajong kim don shuh hynrei lada ki phah sumar bad dih dawai, kin kham ïoh bor.
