Shillong, Nailar 18
Ki nongïalam ka Megha-laya Commercial Truck Owners and Dri-vers Association (MCTODA) ha ka sngi Ba-ar jong ka taïew, ki la leit ban ïakynduh ïa ka Project Director ka Meghalaya Aids Control Society, ka Dr. K.L Iawrod, halor ka jing-kdew ba kawei ka daw ba wan rung u khñiang jingpang HIV/ AIDS ha ka Jylla kadei lyngba ki nongñiah kali.
Ha kane ka jing-ïakynduh, na ka liang ka Project Director ka la ong, ba ka jingkren jong ka, ba ka daw ka jingwan rung u khñiang jingpang HIV ha ka Jylla ka dei lyngba na ki nongñiah kali, kadei ba ka shim bad pynwan na ki por ba la leit ha ki por ba dangïaid u dewïong.
Ha kane ka jingïa-kynduh na ka liang ka MCTODA bad ka Dr. Iawrod ki la ïa kren bniah halor kane bad ka la ong ba ka daw jong ka jingwanrung u khñiang jingpang lyngba ki nongñiah kali, kadei na ka shongkha shongman.
Haba kren sha ki lad pathai khubor, u Presi-dent ka MCTODA u Bah Mossklander Marngar u la ong, ba kadaw jong kane kadei ba ki nongñiah trok kiba kit ba bah na kawei ka jylla sha kawei pat na ka bynta ki kompeni, kim ïoh lad ban leit phai ïing, namar kine ki kompani, kim shah ïa ki ban pep wat tang shi sngi ruh kaba pynlong ïa ki nongñiah kali, ban ïoh ïa u khñiang jingpang HIV lyngba ka shongkha shongman ne lyngba ka jingkyrni dih drok.
“Kadaw ruh ba ki nongñiah trok kim ïoh ka lad ban test ïalade, kadei namar ba kim shym la ïoh ka lad wat tang ban shim shuti ruh, bad lada ki kwah ban leh ïa ka test ruh lada pep trei kin shah beh kam lane shah ot tulop,” u la ong.
Namarkata, u Bah Mossklander u la kyntu ïa ka MACS ba kan phah jingthoh sha ki bor ba halor, khnang ban lait na kane ka jingpang kaba don jingma ha ka Jylla.
“Katkum ka jingïathuh ka Director, ba ka jingsaphriang ka jingpang HIV, kadei naduh ki por ba mynshuwa, ba kynthup ïa ka jingkyrni ha u drok, ka jingshongkha pathar bad ki don ruh kiba saphriang na kiba ñiah trok. Ka jingsaphriang na kiba ñiah trok kadei bha ha ki por ba mynshuwa ha ka por ba dangïaid bha u dewïong,” la bynrap u Bah Mossklander.
Haba bynrap na ka liang u Bah Kyrmenlang Uriah, nongaibuit ka MCTODA u la kyntu ïa ka Director ha ka jingïatreilang bad baroh ki association ha ka Jylla, ba kan kyrpad sha ka Sorkar Jylla, ban ai kawei ka sngi ba kyrpang ban ïoh leh ïa ka test, khnang ba yn lap ba kadei shisha ne em ba ka jingsaphriang u HIV kadei lyngba ki nongñiah trok. Da kaba bynrap “Ngi ruh ngin tip bad kumno kum ki nongïalam ka association ngin ïoh ban ïarap ïa kum kita ki briew ba ngat ha ka jingpang HIV. Bad kan nym don ka jingshah peit khmat ïa kiba ñiah trok”.
