Shillong, Nailar 18
Ka lawei jong ka Regional Democratic Alliance (RDA) kaba ïateh hapdeng ka United Democratic Party (UDP) bad ka Hill State People’s Democratic Party (HSPDP) yn sa rai hadien jong ka ilekshon MP shiteng samoi na Shillong Lok Sabha, la ong u General Secretary ka UDP bad Nongïalam ka Liang Pyrshah ha KHADC Bah Titosstarwell Chyne ha ka sngi Ba-ar.
Haba kylli hato ka RDA ka long tylli kawei, u Bah Titos u la ong baroh ar tylli ki seng kin sa shong jingïalang ban weng lut ïa baroh ki jingïasngewthuh bakla bad ban shim ka rai la yn dang bteng ne pynkut noh ïa kane ka jingïateh lok.
“Ynda, ngi la shong ïa ka jingïalang hapdeng ka HSPDP bad UDP, kaba lah ban long hadien ba la kut ka ilekshon MP shiteng samoi, ngin sa shong bad ïakren la ki don ne em ki jingïasngewthuh bakla. Ngin sa shim pat ïa ka rai la ngin dang bteng ne pynkut noh,” la ong u Bah Titos.
Shuh shuh une u nongïalam ka UDP u la kdew ruh ba ka HSPDP kam pat shym la ai kano-kano ka jingpynsngew ïa ka kyrdan ka jong ka lyngba ka jingthoh, hynrei ka la shu pynbna paidbah ba kan nym kyrshan ïa u kyrtong jong ka UDP ha kane ka ilekshon MP shiteng samoi.
“Kim pat shym la ai eiei sha ngi da ka jingthoh, hynrei ki la dep ban pynbna paidbah pat ha ki kyrwoh jong ki ba kin nym kyrshan ïano ïano ruh,” la ong u Bah Titos.
