Shillong, Nailar 18
U Myntri Rangbah ka Jylla u Conrad K Sangma ha ka sngi Ba-ar u la lum ïa ka jingïalang ban khmih bniah ïa ka jingpyntreikam ïa ka Jal Jeevan Mission (JJM) bad ïa ka jingpynkhreh ka Jylla ïa ka Jal Jeevan 2.0 (Phase II), ha kaba la shem ba 322 tylli ki shnong ki donkam ïa ka jingshah phaikhmat ban pynbiang bad ban pynpoi ïa ka umbam umdih ha ki longïing longsem.
U Conrad u la lum jingïalang bad ka tnad Public Health Engineering (PHE) bad ka kynhun jong ka JJM Meghalaya, da kaba pynleit jingmut halor ka jingtreikam kaba long mynta ha kaban pynpoi ïa ki kor um ha man la ki ïing ki sem, ym da kaba shu kheiñ ïa ka jinglah ban pynpoi ïa ka umbam umdih.
Katkum ka jingkhmih bniah, 87.32% na ki shnong kila ïoh man la ka por ïa ka umbam umdih, katba 79.23% kila ïoh man la ka sngi ïa ka umbam umdih. Tang 71.74% kila kynjoh sha ka jinglah ban pyndap pynbiang ïa ka jingdonkam, kaba pyni ïa ka jingduna ïa ka jingshaniah bad ka jingbun jong ka um ban poi ha ki ïing ki sem.
“Ngi la dep ban ithuh ïa ki 322 tylli ki shnong kiba donkam ban phaikhmat bha,” ong u Conrad haba thoh ha ka rynsan Social Media X, hadien ba la dep pynlong ïa ka jingïalang.
Kane ka jingïalang kala khmih bniah ruh ïa ki daw halor ka jingbym lah ban treikam ki kor um bad la ïatai sani ruh halor ka State Improvement Plan kaba kynthup ïa ka jinglut ha kaban maramot, jingpyndait biang, jingpyntreikam bad jingsumar bad ban pynneh pynsah ïa ka skhim ban sam ïa ka umbam umdih.
Ka jingïalang ka dei shi bynta ban buddien, ïa ki jingïalang kiba la dep ban lum ha ki bnai kiba la dep ban khmih bniah biang ïa ka jingpynpoi ïa ki kor um ha man la ki longïing kiba don ha kylleng ki Block bad District ban pynthikna ba ka jingdon ka umbam umdih bad ban ithuh ïa ki jingduna ha kaban pynpoi ïa ka um bad ka rukom treikam.
U Conrad u la ong, ba ka jingpynleit jingmut ka Sorkar ka long ban pynthikna ba man la ki kor um ki dei ban ai ïa ka um kaba shaniah, kaba dap bad kaba man la ka sngi sha man la ki longïing ha ka Jylla Meghalaya.
