Shillong, Nailar 18
U General Secretary ka United Democratic Party (UDP) uba dei ruh u nongïalam Liang Pyrshah ka KHADC u Bah Titosstarwell Chyne u la kyntu ïa ka Sorkar Jylla ba kan pynkloi noh ïa ka jingthmu kaba la sahteng la slem bha ban pynbna ïa ka surok Umtyngar sha Shella kum ka State Highway.
U Bah Titos u la ong ba ïa kane ka jingdawa la buh nyngkong ha ka por ba dang long MLA u Dr. Donkupar Roy uba la khlad noh hynrei haduh mynta ym pat lah ban pynurlong.
“Kane ka dei ka jingangnud jong ki paidbah jong kata ka thaiñ. Ngi kwah ba ka Sorkar kan pynsted,” u la ong.
U la ban jur ba katei ka surok ka dei ban ïahap bad ka “highway standards” ban pynmyntoi ïa ki nongshong shnong bad ki nongjngohkai pyrthei, ym tang ïa ki kali VIP ban leit sha Sohra.
“Man uwei pa uwei u VIP uba wan jngoh ïa ka Jylla jong ngi u leit sha Sohra. Hynrei ngim dei ban pyrkhat tang na ka bynta kata. Ngi dei ban pyrkhat na ka bynta ki nongjngohkai pyrthei bad ki paidbah,” la ong u Bah Titos.
U la bynrap ba ka jingpynbha ïa katei ka surok kan pynduna ruh ïa ka por leit jingleit. “Kan pynduna ïa ka jingkhapngiah bad ka jingjrong jong ka lynti ïaid, bad kan ïarap ïa ki briew ban poi kham kloi sha Sohra da 10 haduh 15 minit,” u la ong.
“Ka jingkyrpad jong nga ïa ka Sorkar ka long ban pynsted ïa ka jingtyrwa khnang ba yn ïoh ïa ka kyrdan State Highway ïa kane ka surok ha kaba kloi tam,” u la bynrap.
