Shillong, Nailar 18
Ka tnad pulit ka East Khasi Hills ha ka 18 tarik u Nailar 2026, ka la pynkup burom kyrpang ïa ki pulit pynïaid kali, kiba la trei shitom bad ïeng ha surok phra kynta ha u slap, ka sngi bad khlem ka jingkhñium ha Police Reserve, Jail Road.
Haba kren ha kane ka sngi, Superitendent of Police (SP) ka East Khasi Hills District, u Bah Vivek Syiem u la ong ba ka sienjam ba u SP Traffic u la leh ban pynkup burom ïa ki pulit traffic bad ïa ki Home Guard, kiba don bynta ban pynïaid kali, ka long kaei-kaei kaba ai mynsiem ïa kiwei pat.
U Bah Vivek u la ong, ba ki traffic ki la trei ïa ka kam kaba eh bha, man la u wei pa u wei uba sah kut ha ka dheng kali ki kren halor ki pulit pynïaid kali.
“Ki mat shibun ki jingshah kren, la kadei ha ki nongñiah kali, ki paidbah, ka jingma kaba ki buh ïalade ban peit ba ki paidbah ki lah ban ïaid bad ban pyntip sha kiwei ba ka don ka kali kit nongpang kaba ngi hap ban pyllait. Ka kam kaba ki leh ka long haduh katta-katta,” u la ong.
U SP u la ong ruh ba u sngewthuh haduh katno ki ophisar kiba don ha ka kam ban pynïaid kali ki mad, ki don ki briew kiba tim ba tla, ki don ki briew kiba kam ba kidei ki briew jong uta uta, ki jingeh kidei haduh katta-katta, wad hapdeng katne ki jingeh ki mad hynrei ki trei la ka kam khlem jingsalia.
U la bynrap ruh da kaba ong, “phi dei ka dur ba paw jong ki pulit ka Jylla Meghalaya, ki pulit jong ka East Khasi Hills lyngba ki kam kiba phi trei. Ka tnad ka don ryngkat bad phi ha ki kam kiba phi leh na ka bynta ka imlang ka sahlang.
U la kyntu ïa baroh ban ïeng skhem haba ki pyntrei kam ïa ki kyndon bad ki aiñ, kiba ïadei bad ka jingpynïaid kali.
U la ai khublei ruh ïa u Bah Samborlang Diengdoh bad u Bah Anthony Nongkhlaw, kiba na ka por sha ka por ki ju don ryngkat bad ka tnad ha ki bynta baroh bad lada ki paidbah ka jylla ki wan sha khmat ban ïatreilang bad ki pulit, shibun ki jingeh lah ban weng, la kadei ha ka jingïatakhuh kali, ne kiwei ki jingeh kiba ïadei bad ka ïaid ka ïeng jong ki paidbah.
