Shillong, Nailar 18
U Myntri ka koit ka khiah ka Jylla, u Bah Wailadmiki Shylla u la ong ba ka Meghalaya kam shym la ïohi ïa kano-kano ka jingkiew kaba buh jingma ha ka jingpang ‘Dengue’, watla ka tnad ka koit ka khiah ka la pynjur ïa ka jingpeitngor ha ki jaka khappud hadien ki khubor kiba la mih na Bangladesh.
“Ngi la bthah ïa ki kynhun jong ngi, khamtam kito kiba don ha ki jaka khappud, ba kin long kiba husiar bha,” la ong u Bah Wailad ha ki nongthoh khubor ha ka Sngi Ba-ar.
“Kumba ka long mynta, ngim pat ïoh pdiang kano-kano ka khubor ka ban buh jingma na kine ki jaka,” u la ong.
U Myntri u la ong ba ki kynhun peitngor ki dang buddien ïa kane ka jinglong-jingman bad ba la bthah ruh ïa ki Sub-Centre, ki PHC bad ki CHC ha kylleng ka Jylla ba kin pyntip mardor halor kino-kino ki jingsuba ba ïadei bad kane ka jingpang.
“Kam don ka jingkiew ïa kaba mynta. Don ki ‘case’ kiba ju don, hynrei ngim shym la ïohi ïa ka jingkiew, khamtam haba ngi peit ïa kaei kaba jia ha ka ri ba marjan jong ngi,” u la ong.
Shuh shuh u Bah Wailad u la bynrap ba ki jaka ai jingsumar bad ki kynhun peitngor ki long kiba la pynkhreh bad kin ïai bteng ban khmih bniah bad shimkhia ïa ka jinglong-jingman.
