Jowai, Nailar 18
Ka Jaiñtia Student Union (JSU) kala ujor sha ka National Green Tribunal (NGT) Eastern Zone Bench, Kolkata pyrshah ïa ka Sorkar Meghalaya, ka Meghalaya State Pollution Control Board (MSPCB), ka State Environment Impact Assessment Authority (SEIAA), Meghalaya, ka State Expert Appraisal Committee (SEAC), Meghalaya, ka Ministry of Environment, Forest and Climate Change (MoEF&CC), ka Central Pollution Control Board (CPCB), u DC bad SP ka East Jaiñtia Hills kumjuh ka Shree Cement Ltd.
Ha kane ka jingujor la ïalam da u Bocheru Mi Pohsnem, Education Secretary, ha ka jingdonlang u Jersom Shylla, President bad Wansalan Dame Patwet, Assistant Finance Secretary kiba la aiti ïa ki sakhi satar haba ïadei bad ka jingjia ha ka public hearing ka Shree Cement Ltd.
Ka JSU kala ong ba wat kala ai por 10 sngi ïa ka Sorkar Jylla ban pyndam ïa ka Public Hearing ka Shree Cement Ltd kaba la pynlong myn ha ka 31 tarik Naitung hynrei wat hadien ba la kut ka jingai por, ka Sorkar kam shym la leh eiei halor ki jingujor bad ki ejahar ba ka seng kala dep ban buh sha kiba bun ki tnad Sorkar.
Ka JSU kala kyrpad ïa ka NGT ban pyndam noh ïa ka Public Hearing kaba la dep ban pynlong namar ba bun kiba pyrshah ïa ka Appendix IV ka EIA Notification, 2006.
Nalorkata, kala kyrpad ruh ban pynlong da ka Digital Aerial Survey ïa ki jaka ba thmu ban tih mawshun khnang ban ïada ïa ka wah Litein, ki krem ba don ha Shnongrim, bad ban pynbna ruh ïa ka Shnongrim-Nongkhlieh Karst Ridge kum ka Eco-Sensitive Zone.
Ka JSU kala aiti ruh ïa ka sakhi da ka video sha ka NGT, kaba pyni ïa ki jingjia ha ka por pynlong ïa ka Public Hearing haduh ka jingtih ïa ka surok, ka jingshah lynthem maw ka Ambulance jong ka seng haduh ba la mynsaw u nongñiah, ka jingshah khang lynti ka longkmie armet ha ka por leit wad jingsumar.
Shuh shuh ka JSU ka pyntip ba kan sa leit ujor da ka mukotduma sha ïingkashari High Court ban dawa pynshitom ïa baroh kiba donkti bad ïa ka Sorkar Jylla halor ka jingbym trei hok ïa ka kam.
