Shillong, Nailar 19
U Myntri Rangbah Conrad K Sangma, ha ka sngi Balang, u la buh ïa u mawnongrim ban tei ïa ka Veterinary Hospital ka Jylla ha Upper Shillong, kaba la mang ban pynlut haduh T.65 klur.
Ïa kane ka jingbuh mawnongrim la leh ha ka jingïalang bala pynlong ha INDO DAN Guest House, Upper Shillong ha ka jingïadonlang u Myntri ka tnad Animal Husbandry & Veterinary, Bah Sanbor Shullai, MLA ka Mylliem Bah Ronnie V Lyngdoh, u Chief Secretary Dr. Shakil Ahammed bad ki ophisar na ka tnad AH & Veterinary.
Haba ai jingkren, u Myntri Rangbah u la ban jur ïa ka jingdonkam ban don ka rukom treikam kaba kynthup ïa baroh ki bynta ba palat ban ïa ki skhim shimet ha ka tnad Veterinary da kaba phaikhmat halor ka jingsumar ïa ki mrad bad wanrah ïa ka rukom treikam kaba ryntih.
“Ka jingthmu ba kham heh bad ka thong ka long ban thaw ïa ki lad kamai jakpoh bad ban pynduna ïa ka jingïapher ha ka jingdawa bad jingshalan lyngba ki jingpyrshang kiba la pynbeit ryntih,” u la ong.
U Myntri Rangbah u la ñiew ïa ka State Veterinary Hospital kum ka ‘hub’ bad ki district bad sub division headquarter kum ki ‘spoke’ bad bynrap “Ka hospital kan ym lah ban treikam lada ngim don ïa ka hub bad ki spoke ban pynkhlain ïa ki jingtei bad jingdonkam kum ki machine, ki tiar sumar, ki dawai, ki briew ha man ki kyrdan”. U la ban jur ruh ïa ka jingkongsan ban kynjoh ïa ka thong da kaba pyndep kawei hadien kawei ka kam.
Haba pynkut, u la ban jur ïa ka por pyndep kaba shai bad ka jingtrei kaba bha ha kane ka projek. “To ngin pynthikna ba kane ka Veterinary Hospital kan dei kawei na ki hospital kiba biang eh bad ka jaka wad bniah ha ka jingsumar ïa ki mrad hapoh ka thaiñ Shatei Lam-Mihngi baroh kawei,” u la ong.
Ka State Veterinary Hospital ka dei ka jingkynshew kaba kongsan ba jan kot T.65 klur ha ka jaka ba 161 hectare jong ka tnad, kaba batai ïa ka jingkut jingmut jong ka Sorkar halor ka koit ka khiah ki mrad, ka jingkiew shaphrang jong ki nongri jingri bad ka ïoh ka kot ki nongkyndong ba shaniah halade.
Ka State Veterinary Hospital ba don mynta, kala shakri ïa ka Meghalaya la bun snem, hynrei kala ïakynduh jingeh namar ka jingrit ka jaka bad jingbym lah pynbiang ïa ki tiar ki tar. Palat ïa 25% ki mrad ba ai jingsumar man ka sngi ki dei kiba phah wan na kylleng ki bynta ka Jylla, ka dak ba shai ba donkam ïa ka jaka ai jingsumar kaba heh, kaba khlain bad kaba long katkum ka juk ba mynta.
Kane ka State Veterinary Hospital ba thymmai kan tyrwa ïa ki jingsumar katkum ka juk mynta, ki jingsumar da ki doktor specialist, ka radiology bad Imaging, surgery, orthopaedics, inpatient services, laboratory bad pharmacy ki ban long baroh ka kawei ka tnum nalor ka 24×7 emergency care bad kiwei kiwei
