Shillong, Nailar 19
U Myntri Sorkar uba long ruh u nongaiktien ka Sorkar MDA, u Bah Wailadmiki Shylla ha ka Sngi Balang u la kyrpad ïa ka Khasi Students’ Union (KSU) ban wan shakhmat ban ïakren, da kaba ban ba ka Sorkar ka long kaba la pynkhreh ban sngap bad pynbeit ïa ki jingeh lyngba ka jingïakren.
Haba kren sha ki lad pathai khubor halor ka jingïakhih ka KSU, u Bah Wailad u la ong ba ka Sorkar ka plie ka lad ban ïakren haba ïadei bad baroh ki mat kiba ka seng ka la pynsngew.
“Hooid, ngi tikna bad ngi long kiba la khreh ban ïakren. Nga kwah ban pynpaw shai ba ka Sorkar ka plie ka lad ban ïakren. Ngi long kiba khreh ban sngap bad ban don ka jingïakren,” u la ong.
“Nga tharai ba kata ka dei ka lynti ban ïaid shakhmat. Kumta nga kyrpad bad kyntu ïa ka KSU ba kan wan ban ïakren bad ka Sorkar,” bynrap biang u Bah Wailad.
Kumban shu kdew hangne, ka KSU ka la aiti ïa 5 tylli ki mat jingdawa sha ka Sorkar ban pynurlong mardor ïa ki.
Ki jingdawa ba kongsan ki dei halor ka jingpynsngew paidbah kaba la long ha ka 31 tarik u Naitung, 2026 na ka bynta ka Shree Cement ha East Jaiñtia Hills, kaba ka seng ka la kynnoh ba la dep ban “pynbeit lypa.”
Ha kaba ïadei bad kane, ka KSU ka la kyntu ruh ban leh eiei pyrshah ïa u Deputy Commissioner, Superintendent of Police, ki heh pulit bad ki ophisar ka Meghalaya State Pollution Control Board, ha ryngkat ka jingpynshitom lyngba ka tnad ïa kito kiba shah kynnoh (ba ki) khanglad ïa ka jingïashim bynta.
Ka seng ka la dawa shuh-shuh ban pyntreikam pura ïa ka Meghalaya Residents Safety and Security Act, 2016 tad haduh ban da pyntreikam ïa ka Inner Line Permit (ILP). Ka la kyntu ruh ban buh ïa ki ‘Facilitation Centre’ ha baroh 18 tylli ki ‘Entry Point’ ha Ri-lum Khasi bad Jaiñtia bad ka jingpynshisha ka ban leh tang da ki Dorbar Shnong.
Kiwei pat ki jingdawa ki kynthup ban pyntreikam noh mardor ïa ka aiñ Migrant Workmen Act, 2020 ba la pynkylla, ki jingpynkylla ha ka thungkam ha NEIGRIHMS da ka jingïakheiñ 80:20 (Female-to-Male Ratio) ïa ki nos bad ka jingbhah kyrpang ïa ki Khasi, Jaiñtia bad Garo, kumjuh ban weng noh ïa ki ‘Interview’ na ka bynta ki kam ‘Grade B’, ‘C’ bad ‘D’ nalor ka jingsaiñdur ïa ki ‘Standard Operating Procedure’ na ka bynta baroh ki ‘Recruitment Board’.
