Shillong, Nailar 19
U Bah Powell Sohkhlet uba long u Executive Member (EM) ba peit ïa ka tnad Khyndew jong ka Khasi Hills Autonomous District Council (KHADC) u la ïathuh ba ka EC kan sa shong da ka jingïalang haba ïadei ban bishar bniah haba ïadei ki kam jong ka Hima Langrin.
Haba kren sha ki nongthoh khubor hadien ka jingïalang, u Bah Powell u la ïathuh ba ïa ka kam haba ïadei ka Hima Langrin la shimti hi da u Chief Executive Member (CEM) naduh kaba sdang, hynrei ha ka jingïalang ba ka khot ïakren ïa ki nongïalam jong ki Khun ki Hajar ka Hima Langrin, u la shu shimti ban pynïaid ïa ka jingïalang namar ka jingbymdon u CEM.
U la ïathuh ruh ba ha ka jingïalang ki Khun ki Hajar ka Hima Langrin ki la aiti ruh ïa ki jingujor, ha kaba na ka liang jong ka Executive Committee (EC) kan sa shong bishar bniah ha kine ki sngi la ki jingkynnoh ki long kiba shong nongrim ne em bad ïa kane ka kam yn sa shimti hi u CEM ban bishar bniah kumjuh ban pan jingpynshai lane ban khot jingïalang.
Ha kaba ïadei ka jingbym ailad ban rung ha phyllaw jong ka KHADC, u Bah Powell u la pynshai ba ka jingwan rung paidbah ki nongïakhih ka la ktah jur bad pynwit ïa kiba wan donkam haba ïadei ki kam bapher-bapher hapoh ka shlem treikam bad pynpaw ruh ba ki la don bun ki jingujor haba ïadei kane bad dei namar kata ka daw ba ka Council ka khlem ailad ïa ki ban rung ha phyllaw jong ka Council.
