Shillong, Nailar 19
Ka nongbah Shillong ha ka janmiet jong ka sngi Balang ka la sakhi ïa ka jingsniew jong ka jinglong jingman na ka jingshah pynjulor jong kiba bun tylli ki kali, kaba kham bun ki dei ki kali Sorkar kiba la shah lun maw bad shah thang, ka jingshah lun maw jong ki kali shimet, ka bos kamai, ka jingshah ktah kti jong ki briew ba ïaid ba ïeng harud surok, kaba la wanrah ïa ka jingshong syier ha ki nongleit nongwan.
Kane ka jingjia, ka la jia ha ka por ba ka Khasi Students’ Union (KSU) ka la pynlong ïa ka ‘Bike Rally’ ryngkat ka rah lama ïong kum shibynta jong ka jingïakhih halor ki 5 tylli ki mat jingdawa.
Ka KSU kala pynlong ïa kane ka rally halor ka nongrim ïa kaba ka seng ka kynnoh ba ka Sorkar kala sngap jar jar ïa ki mat jingdawa jong ka. Ïa kane ka jingïaid rally jong ki arshaka la pynlong na ophis jong ka KSU ha Jaiaw bad hadien ba la ïaid kylleng ka nongbah Shillong, la pynkut ruh ha Jaiaw.
Tang hadien katto katne por jong ka jingïaid rally, la saphriang ki durkhih (video) ha ki rynsan social media halor ki kam thombor, ha kaba ki riew shim kabu kiba la don ha kane ka rally bad kiba bun kiba la kah durkhmat, ki la ker kut ïa ka kali Sorkar ha kiba bun ki bynta jong ka nongbah Shillong bad kila bom naphang da ki dieng bad ki maw ban pynjulor ïa ki.
La ïoh ruh ban sakhi ïa ka jingshah wiang ding jong kawei ka kali Sorkar, kata ka kali Bolero hapdeng jong ka surok ha ka thaiñ Mawlai Nongmali.
La saphriang ruh kawei ka video kaba pyni ba ki la don ki runar shim kabu kiba la hiar na ki arshaka jong ki, ban lun da ki maw ïa kawei ka bos kamai paidbah, haduh ba kiba shong bos kiba kynthup naduh ki longkmie, ki samla bad khynnah ki la rit mynsiem bad hap ban dem dngong shapoh namar ka jingtieng ïoh dei da u maw ne da ki ïit pait.
Nalor kane, la sakhi ruh ba ha kylleng ki bynta jong ka nongbah, ki runar shim kabu ki la ñiom naphang ban tied, kyrdem, kynjat ban pynjulor bad pynpait ïa ki kali kiba ïaid ha surok bad kiba khambun ki dei ki kali Sorkar.
Ki kali kiba shah pynjulor ki long kawei ka kali escort ki Pulit ba don ïa u registration number ML05-AC-7081 kaba la shah pynpait ka ïit. Ka kali jong ka National Informatics Centre ruh kala shah pynpait ka ïit ba nadien ha ka thaiñ Barik. Kiwei pat ki kali kiba shah pynjulor ki kynthup ïa ka kali AS01-ES-8243, AS11-AH-5190, ML01-5620, ML01-A-4444, ML01-A-0966 nalor kiba bun kiwei pat.
Kawei ka pick-up ba don u numbor ML05-AD-0925 bad ka trok ka tnad Telecom AS01-P-2707 kila shah pynjulor.
Nalor ka jingshah pynjulor jong ki kali, ki runar ki la pynjulor ruh ïa ki ïit jingker jong u mot u Swami Vivekananda ba pynïeng ha RRCWS ha u snem 2025 ha RR Colony.
Shwa kane ka rally, ka KSU kala pynlong ïa ka jingïakhih ba shipor hakhmat ka Main Secretariat ha kaba kila wah ïa ki banner ba kynnoh ïa ka Sorkar ba ka thung briew lajong bad bamsap ha ka thungkam thungjam.
Ki banner kila kynnoh ïa ka Sorkar ba jied briew lajong bad bamsap ha ka thungkam thungjam bad dawa ïa ka jingthungkam kaba khuid bad ba shai.
“Ngi la pule shitom, ngi la pass hynrei haba kut ka sngi, ïa ki kam la ai tang sha kito kiba lah ban thong pisa,” ong kawei ka banner.
Shuwa kane, ka KSU kala ïaid pynlong ïa ki jingïalang paidbah ha kylleng ka sor Shillong ha ka 17 bad 18 tarik Nailar hadien ba kut ka jingaipor ba 15 sngi ïa ka Sorkar.
Ka KSU kala pynlong ïa kane ka rally ban tynjuh ïa ka Sorkar Jylla ba kan pyntreikam ïa ki 5 tylli ki mat jingdawa ba kynthup ban pynduh pyndam ïa ka public hearing ka Shree Cement ba long ha ka 31 tarik Naitung ha East Jaiñtia Hills, ban pyntreikam pura ïa ka MRRSA katbym pat lah pyntreikam ïa ka ILP, ban pynbeit ryntih ïa ka thungkam thungjam bad kiwei-kiwei.
Halor kine ki jingjia baroh, ki pulit kila register case lut ïa baroh kine ki jingjia bad kila pynkhlain ïa ki bor pahara hapoh ka district baroh kawei ban pynthikna ïa ka jinglong jingman kaba suk bad kaba sain.
