Shillong, Nailar 20
Ka tnad Pulit ka Jylla kala register haduh 15 tylli ki ejahar namar ki kam thombor ha ka ‘bike rally’ jong ka KSU ha ka sngi Balang, kaba lam sha ka jingjulor haduh 31 tylli ki kali, mynsaw 16 ngut ki briew bad artylli ki kali ba shah thang, ong u Superintendent of Police ka East Khasi Hills Bah Vivek Syiem.
U SP u pyntip ba ki pulit kila pynlong ruh ïa ka jingthwet kaba jur ïa ki briew kiba leh ïa ki kam thombor ha kane ka rally.
Lai ngut ki nongïalam ba hakhmat ka KSU kiba pynbeit ïa kane ka rally, kila shah kem na ka restaurant ha Shillong bad la phah set ïa ki hapoh ka Judicial Custody ba 14 sngi, ong u Bah Vivek.
“Ha ki kam thombor ha ka janmiet ka sngi Balang, kumba 31 tylli ki kali kila shah pynjulor bad 16 ngut ki briew kila mynsaw bad artylli ki kali kila shah thang. Kumba 15 tylli ki ejahar la ïoh ban pdiang haduh mynta. Ka jingtohkit kala ïaid shakhmat halor kiwei pat ki case ban pynithuh ïa ki briew kiba leh ïa kine ki kam thombor bad thang kali,” u la ong.
U SP u la pyntip ba ïa kane ka rally la khmih lynti ba kan long kaba jai jai hadien bala ai ïa ka jingbit ryngkat ki kyndon.
“Ka KSU kala pan ïa ka jingbit bad la buh ruh ïa ki kyndon. Ngi ngeit ba kan long ka rally kaba jai jai, kumta ngi la buh ïa ki pulit tang ha ki jaka ba donkam. Hynrei kam shym la long kumba la khmih lynti bad kala mih pynban ka jingthombor,” u la ong.
U Bah Vivek u pyntip ba ki pulit kila don bun bah ki video bad ki sakhi halor kane ka jingjia.
“Ngi la don bun ki sakhi bad ki video ban pyni ba ki nongshong thuk thuk kila donkti ha ki kam thang kali, pynjulor kali bad shoh ïa ki briew. Kumba 200 tylli ki thuk thuk kila mih ha kane ka rally. Ngi hap ban pynithuh mano na kine ki briew kiba donkti ha ki kam thombor kiba jia,” ong u Bah Vivek.
U pyntip ba ïa ka MMPO la pyntreikam mynta ha ryngkat ki kyndon ba lum paidbah beaiñ, shoh briew bad pyntieng pynsmiej.
Halor ka jingkynnoh ba pyndonkam palat pud ïa ka bor ha ka jingkhynra ïa ka ophis ka KSU ha Jaiaw, u Bah Vivek u la pynshai ba ki pulit kila leit ban kem shuh shuh ïa ki briew ba donkti ha ki jingthombor bad mad pynban ïa ka jingïaleh pyrshah.
“Ki Pulit kila shah kawang petrol bomb, kumta ban pynsaphriang ïa ki paidbah ngi hap ban siat ïa ki stun grenade. Kam dei satia hapoh kano-kano ka ïing paidbah ne shimet, hynrei tang ban pynpra ïa u paidbah. Hadien ba ki nongïalam shnong kila kyrpad, ki pulit kila wan phai noh,” u la ong.
