Shillong, Nailar 20
Ka ïingbishar Meghalaya High Court kala bthah ïa ki bor khmih ba kin shim ïa ki lad ki lynti kiba bniah bad ba mardor ban kem ïa kiba donkti ha ki kam thombor ha ka bike rally ka Khasi Students’ Union (KSU) ha ka 19 tarik Nailar ha Shillong.
Ka ïingbishar kala pynmih ïa kane ka hukum haba shim ïa ka mukotduma suo motu halor ki kam thombor kiba mih na ka rally ka KSU, kaba wanrah ïa ka jingjulor ki kali Sorkar, Pulit bad kali kamai paidbah bad buh jingma ïa ki nongshong shnong kynthup ki khynnah skul.
Haba shong bishar ïa ka PIL, ka Division Bench u Justice HS Thangkhiew bad Justice W Diengdoh, kala ñiew ïa kine ki jingjia kum ki jingjia ba sngewkhia.
U Advocate General u la pyntip ïa ki sienjam bala shim da ki bor khmih bad ïathuh ba katto katne na ki nongkitkam jong ka Sengbhalang kila shah kem.
Kala bthah ïa ka Sorkar ban aiti ïa ka kaiphod halor ki sienjam bala shim ha ka 24 tarik Nailar, ha ka sngi bala buh ban bishar biang ïa kane ka mukotduma.
