Shillong, Nailar 20
Ki bor pynïaid district ka East Khasi Hills kan sa pyntreikam ïa ka Meghalaya Maintenance of Public Ordinance (MMPO) Act, ban phah siew ha ka Khasi Students’ Union (KSU) ïa baroh ki jingpynjulor ïa ki nongkynti paidbah bad shimet ha ka jingïaid ‘bike rally’ ba lam sha ki kam thombor ha ka sngi Balang.
Ka la don ruh ka jingujor ejahar (FIR) halor ka jingkawang petrol bomb sha ki pulit ha ka por ba ki leit khynra ïa ka ophis ka KSU ha Jaiaw.
Lai ngut ki nongïalam ka KSU ba kynthup ïa u President samla Raymond Kharjana, Vice President samla Pynkmenlang Sanmiet bad General Secretary samla Reuben Najiar, kila shah kem hadien ka rally.
U Deputy Commis-sioner ka East Khasi Hills Abhilash Baranwal ha ka sngi Palei u la ong ba kane ka rally kala pynkheiñ ïa ki kyndon ai jingbit bad kala kylla long ka jingïalum paidbah ba beaiñ.
“Ïa ki kyndon pynlong rally la pynkheiñ da ka KSU. Ka don ka kyndon ha ka jingai jingbit ba lada ki pynkheiñ ïa ki kyndon, kala kylla long kam beaiñ bad ka jingai jingbit kam treikam shuh. Kumta kala long ka jingïalum paidbah ba beaiñ bad namar kata, ïa ka ejahar la mudui bad ka jingtohkit ka la ïaid shakhmat,” ong u DC.
U DC u pyntip ba ki pulit ki dang pyrshang mynta ban wad ban ithuh ïa ki briew kiba donkti ha ka jingthang kali, pynjulor kali bad ba shoh ïa ki nongïaid nongïeng ha kane ka rally.
Haba batai bniah halor ki jingjulor, u DC u la ong, ‘Wat ki kali shimet kila shah pynjulor, 16 ngut ki briew kila shah shoh, artylli ki mot u Netaji Subhas Chandra Bose bad Swami Vivekananda kila shah pynjulor bad artylli ki kali-kawei ka kali Sorkar bad kawei ka kali nabar Jylla- kila shah thang”.
Halor ka jingkhyllie pat ïa ka jingjulor, u Abhilash Baranwal u la ong, “Ngin pyntreikam ïa ka MMPO Act bad yn pynjari ïa ka kyndon ban siew ïa baroh ki jingpynjulor ïa ki nongkynti paidbah bad shimet. Katkum ka Act, ka seng lane ki briew kiba donkti ha ka ban pynjulor kum shibynta jong kano-kano ka jingïaid paidbah ne rally kin hap ban siew. Ngin sa pynmih noh ïa ka hukum”.
U Deputy Commissioner u la pynbna ruh ïa ka jingpynsangeh noh ïa ka jingai jingbit sha ka KSU ba kan pynlong ïa ka jingïakhih ha ka sngi Thohdieng.
“Namr kane ka jingjia, wat ïa ka jingbit ba la ai na ka bynta ka bike rally, lyngba ki jingthoh bad ki jingïakren, la kular ha ngi ba kan long kaba rally kaba jai jai bad ba kan nym don ki jingjia thombor kumba jia ha ki snem bala leit. Hynrei, namar ka jingpynkheiñ ïa ki kyndon bad ki jingthombor, ïa ka jingbit bala ai na ka bynta ka jingïakhih lashai ka sngi, ngin sa pynduh noh,” u la ong.
Halor ka jingkhynra ki pulit ïa ka ophis ka KSU ha Jaiaw ha ka miet sngi Balang, u Baranwal u la ong ba ïa ka ejahar la dep ban mudui ba kawang petrol bom sha ki pulit.
“Hadien ka jingkem ïa ki lai ngut ki nongïalam ka KSU, ki pulit ki kwah ban kem ïa kito kiba donkti bad kiba lah ban pynthikna ïa ka jingdonkti ha ka jingthombor. Kumta, kila leit sha ophis ka KSU ha Jaiaw. Hynrei haba ki poi ha kane ka ophis, kila shah kawang petrol bomb. Namar kata, ïa ka ejahar la ujor halor ka jingkawang petrol bomb,” u la ong.
U la ong ba ka jubab ba la ai da ki pulit ka long kaba biang. “Kam shym la don ka jingpyndonkam palat ïa ki stun grenade lane tear gas, kila hap ban pyndonkam tang uwei u stun grenade bad tear gas tang ban pynpra ïa ki briew kiba pyrshang ban thombor ïa ki pulit. Hadien ka jingwan ki nongïalam shnong, ki pulit kila mih noh khnang ban nym pynmih ïa ka huri hura kaba heh. Kam shym la don kano-kano ka jingthmu na ki pulit ban leit pynthut sha kito ki bym don bynta ha ka jingïakhih bad ka jingpyni bor ka dei na ka liang jong ki,” u la ong.
U DC u pyntip ba ka Sorkar kan sa pynmih ïa ki helpline number na ka bynta ki nongjngohkai kiba sahkut ha kano-kano ka jaka bad kular ban ai jingsumar ïa baroh ki lanot kiba mynsaw.
Haba kylli la ki bor district kin pynjari korphiw, u DC u la ong, ‘Ka korphiw hi ka dei ka sienjam kaba khatduh”.
