Shillong, Nailar 20
Ka Voice of the People Party (VPP) ha ka 20 tarik Nailar, 2026, ka la mih shakhmat ban ai jingmut ha kaba ïadei bad ka jingmih ki jingkulmar hapoh ka Nongbah Shillong na ka jingdon ki riew shim kabu bad ka jingïakhih jong ka Khasi Students’ Union (KSU) ha ka janmiet jong ka 19 tarik u Nailar, 2026.
U President ka Voice of the People Party (VPP) u Bah Ardent Miller Basaiawmoit ha ka kyrwoh ba u kren u la ong, ba ka don ka jingjop lyngba ki jingïakhih da kaba jai-jai bad haba don ki jingkulmar ka ai jingmyntoi pat ïa ka Sorkar.
“Nga kwah ban ai jingmut katkum ka jingïakhih pyrshah ïa ka Sorkar, bad nga kwah ban sdang da ka jingkylli bad ka jingkylli ka long, balei ba ka rukom pynlong jingïakhih kaba jai-jai ka kham bha shibun,” ong u Bah Ardent.
U Bah Ardent u la ong, ba haba don ki jingkulmar ha ki jingïakhih kaba pynmih ïa ki jingmynsaw ki jingkulmar, ka ju long ka kabu kaba khraw ïa ka Sorkar ba kan kiar na ka jingkitkhlieh bad ka Sorkar ka kmen shi katdei eh ba lada ki jingïakhih ki kut noh ha ki jingkulmar.
“Ka jingeh kaba shisha kan shah rong noh bad ki briew kin ym kren shaphang ki jingdawa kiba shisha kiba ka Sorkar kadei ban pynbeit, ha ka jaka kata kin ïakren shaphang ki jingeh kiba mih, ki jingtieng kiba bat ïa ka jingmut jingpyrkhat jong ki paidbah, ka jingshah pynrem bad kumta ter-ter ,” u la bynrap.
“Nga ai khublei ïa ki nongïalam jong ka KSU, haba ki la kren shai ha ki lad pathai khubor ba ki kloi ban pdiang ïa ka jingshah kynthoh ha kaba ïadei bad kaei kaba la jia ha ka sngi jingïakhih, watla ki la kren shai bha ba ka jingïakhih kan long kaba jai jai bad kaba shongsuk. Ha kajuh ka por nga kwah ban pynrem ïa ki riew shim kabu, kiba la shim kabu ban pynthut ïa ka jinglong jingman ha ka Jylla,” la ong biang u Bah Ardent.
U Bah Ardent u la kdew ruh ïa ka jingbym lah jong ka Sorkar ban pynkhlaiñ ïa ka jingpahara ha ka sngi ba pynlong ïa ka jingïakhih.
U Bah Ardent u la pynrem shuh-shuh ïa ka jingleh jong ka Commercial Vehicle Association ba na Assam.
