Shillong, Nailar 20
Ka jingjia huri-hura bad ka jingshim kabu ki briew kah durkhmat ban pynpra bad ban pynpait ïa ki kali Sorkar, ka la wanrah ïa shibun ngut ki nongñiah kali Sorkar kiba dei ki Khasi, kiba la mynsaw na katei ka jingjia.
Kane ka jingjia shah pynpait bad shah thang ki kali Sorkar, ka la jia hynnin ka sngi Balang, kaba dei ka sngi ïaid rally arshaka ki dkhot ka Khasi Students’ Union (KSU), ban pynpaw ka jingpyrshah halor ka jingbym pyntreikam ka Sorkar ïa ki mat jingdawa.
Na ka liang u Nongsaiñ Hima u la ïoh ban ïakren bad u wei u samla, uba ñiah ïa kawei ka kali Sorkar jong ka tnad PHE kaba la shah pynpait bad shah thang dusmon ha ki briew ba kah durkhmat, u la ïathuh ba kadei kaba la jia hynnin janmiet ha ka por kumba 6 baje eiei bad um shym la poi pyrkhat, ba ki runar kin wan shi kynhun ban pynpait dusmon ïa ka kali.
U la ïathuh ba ki runar ki la wan ban bom da u tyrnem bad da ki nar ïa ki ïit kali kaba u ñiah.
Une u Samla u la ïathuh ba u la mynsaw khyndiat na ki bynta ka kti bad la jngem ruh ka met, da kaba pyntip ruh ba u Sir jong u, uba shong hadien u la hap ban shu phet kulmar napoh ka kali.
Hadien ba ki runar ki la bom la pynpait ïa ka kali, ki la sei sa da ka umphñiang bad thang syndon ïa ka kali hapdeng surok, u la ïathuh.
Kane kali kadei kaba don ïa u registration number ML A 01 6152.
“Ngi ïa wan da ka jingthmu ban leit buh noh ïa ka kali sha ophis hynrei mar shu poi ha Mawlai ki wan ki briew da ki bike bad scooty, bad ki la bom beit ïa ka kali nadien bad nakhmat. Ngi la shu dem shapoh namar ba ki ïit ki la sied bad nga la mynsaw,” u la bynrap.
