Jowai, Nailar 20
U District Magistrate jong ka West Jaiñtia Hills u la pynbna da ka hukum hapoh ka kyndon 223 jong ka Bharatiya Nyaya Sanhita (BNS) kaba khang ban die bad sam ïa ka petrol bad diesel ha kino-kino ki jait jingbuh jingsat hapoh u pud u sam jong ka West Jaiñtia Hills tad haduh ban da pynmih da kawei pat ka hukum.
Ïa katei ka hukum la pynmih hadien ka jingïaid paidbah kaba la pynlong da ka Khasi Students’ Union (KSU) ha ka 19 tarik Nailar, bad haba peit ïa ka jinglong jingman kaba mynta bad ka jinglah ban pynjur shuh shuh ïa ka jingïakhih.
U District Magistrate u la pynpaw ba ïa kane ka hukum la shim ba ka long kaba donkam na ka bynta ka jingbit jingbiang jong ki paidbah, ka jingïada ïa ki mar ki mata jong ki paidbah bad ban ïada na kano kano ka jingjia kaba sniew.
Ka hukum ka la ong shuh shuh ba ka jingdie ïa ka umphniang bad ka diesel ha ki jerkin bad ki bilor bad kiwei-kiwei ki jingbuh jingsat khlem ka jingbit kaba biang la khang pyrshah katkum ka kyndon jong ka Petroleum Act, 1934.
Kino kino ki briew kiba la lap ba ki pynkheiñ ïa ka hukum kin ngat ha ki kyndon aiñ katkum ka Section 223 jong ka Bharatiya Nyaya Sanhita (BNS) bad kiwei-kiwei ki kyndon aiñ kiba ïadei bad kane.
Hynrei ka jingdie umphniang diesel na ka bynta ki mobile tower bad ki kompeni shna surok kan dang ïai bteng katkum ka hukum kaba la don lypa.
