Khliehriat, Nailar 20
Ka kynhun jong kumba 5-6 ngut ki suba khar Bangladesh ha ka step phyrngab jong ka 20 tarik Nailar kila wan rung jubor bad lute naphang ïa kawei ka ïing ha ka shnong Dona Bhoi, East Jaiñtia Hills, kaba don ha ka thaiñ khappud bad ka Bangladesh.
Halor kane ka jingjia, u trai ïing u Sarthe Teron u la mudui da ka ejahar ha u In-charge officer ka Umkiang Police Patrol Post, East Jaiñtia Hills District ha kane ka juh hi ka step.
Katkum ka ejahar ba la mudui une u trai ïing u la ïathuh katba ma u, ka kurim bad ki khun jong u, ki dang ïohthiah lyngngai ha ka por ba jur bha u slap, ka kynhun kaba don kumba 5-6 ngut ki briew ki bym lah ban tip, kiba suba ba ki dei ki nong Bangladesh, ki la pynpait pynpra ïa ka jingkhang ba shadien jong ka ïing bad rung jubor hapoh ïing.
“Katba ngi dang ïohthiah kitei ki suba nongtuh kila teh ïa nga, ka kurim bad ki khun jong nga ryngkat ka jingbyrngem byrsit, ha kaba uwei na ki u la pynap da ka wait na ryndang jong nga bad la maham ba lada pyrta jingïarap lane pynsawa kin pynïap ïa ngi,” ïathuh u trai ïing.
Shuh shuh u la ïathuh, ba ki suba nong Bangladesh kila pynpra ïa ka almari buh jaiñ bad kila tuh ïa ki tiar ki tar kynthup ka pisa T.30,000/-, kawei ka mobile smartphone, ki jaiñ thymmai, ka pla skul khun nalor kiwei-kiwei tiar ki tar ïing.
Hadien ba kitei ki briew kila mih na ïing, u trai ïing mar mar u la pyntip sha ki nongshong shnong. Ki nongshong shnong ki la pyrshang ban thwet bad kem ïa kitei ki runar, hynrei ym shym la lah ban kem ïa ki namar ba kila phet krad sha ka liang jong ka Bangladesh.
Na ka liang u trai ïing, u la kyrpad jur ïa ki bor pulit ba kin shim ïa ki sienjam kiba donkam katkum ka ain khnang ba ki nongshong shnong kin don hapdeng ka jingshngaiñ bad kyrpad ruh ban shim ïa ki lad jingïada kiba donkam khnang ba kum kine ki jingjia kin nym jia shuh hadien habud.
Na ka liang ka Khasi Student Circle hapoh ka jingïalam u President Samla Phanuel Tongper, mar sien ïoh jingtip halor kane, mar mar kila leit ban jurip ïa katei ka longïing.
Ka KSU Narpuh Circle kala pynrem jur ïa kane ka jingjia, da kaba ong ba kum kine ki jingjia shah lute, shah pynïap ki nongshong shnong kiba shong ba sah ha ka thaiñ khappud bad ka Bangladesh, ki shait jia man u snem.
Ka KSU kala pynkynmaw ruh ba ha snem 2025, kum kane ka jingjia thombor jong ki kynhun suba nong Bangladesh ka la wan jia ruh ha kawei ka longïing ha ka shnong Umkiang.
Ka seng kala ong ba kam kwah shuh ban dang ïohi ïa kiba kum kine ki jingjia bad ka dawa na ki BSF ban peitngor bad ai ka jingïada kaba pura ïa ki nongshong shnong ka thaiñ khappud.
